गान्तोक, १३ सेप्टेम्बर (हि.स.)। विद्या भारती अखिल भारतीय कार्यकारिणीको महत्वपूर्ण बैठक मध्य प्रदेशको जबलपुरमा ११ देखि १३ सेप्टेम्बर, २०२६ सम्म सम्पन्न भएको छ। बैठकमा विद्या भारती सिक्किमका अखिल भारतीय सहमन्त्री पवित्रा दाहाल तथा प्रान्तका महासचिव विजय कुमार शर्मा सहभागी भए।
विद्या भारती सिक्किमका संयोजक (प्रचार-प्रसार) सूर्य धितालले बताए अनुसार, बैठकमा संगठनको आगामी दिशालाई स्पष्ट तथा प्रभावकारी बनाउन विस्तृत छलफल गरियो। विद्यालय तथा विद्यार्थी सङ्ख्यामा निरन्तर वृद्धि, शैक्षिक गुणस्तर सुनिश्चित गर्ने, कमजोर विद्यालयलाई सशक्त बनाउने तथा सन् २०३० सम्म नयाँ विद्यालय विस्तार गर्ने ठोस कार्ययोजनामा सहमति भएको छ।
अमृत महोत्सव तथा वन्देमातरम्को १५०औँ वर्षको भव्य आयोजनाका साथै महिला कौशल विकास, समयदानी कार्यकर्ताको सङ्ख्या वृद्धि, आचार्यहरूको प्रशिक्षण, डिजिटल शिक्षण सामग्री, आदर्श विद्यालयका सफलताका कथाहरू तथा राष्ट्रिय शिक्षा नीतिको प्रभावकारी कार्यान्वयनमा विशेष जोड दिइएको छ। वित्तीय अनुशासन, प्रशिक्षण केन्द्रको सुदृढीकरण तथा सांस्कृतिक जागरणलाई समेत संगठनात्मक प्राथमिकतामा राखिएको उनले बताए।
तीनदिने बैठकमा संगठनका वर्तमान उपलब्धिको मूल्याङ्कन गर्दै आगामी वर्षका लागि स्पष्ट दिशा निर्धारण गरिएको छ। सहभागी प्रतिनिधिहरूले संगठनात्मक विस्तार, शैक्षिक उत्कृष्टता तथा राष्ट्र निर्माणको लक्ष्यलाई अझ प्रभावकारी बनाउने सङ्कल्प व्यक्त गरेका छन्।
बैठकले अखिल भारतीय स्तरमा समन्वय, अनुशासन तथा एकजुटता कायम गर्दै संगठनको सामूहिक प्रतिबद्धता, शैक्षिक उत्कृष्टता तथा राष्ट्र निर्माणको सङ्कल्पलाई थप सुदृढ बनाउने आधार तयार गरेको उनले बताए।
हिन्दुस्थान समाचार / बिशाल
