गेजिङ, १४ सेप्टेम्बर (हि.स.)। गेजिङ जिल्ला प्रशासनका अधिकारीहरूले आज रिम्बीमा सक्रिय पैह्रोस्थलको स्थलगत निरीक्षण गरी अवस्थाको मूल्याङ्कन गरेका छन्। साथै, प्रभावित तथा जोखिममा रहेका क्षेत्रका बासिन्दाहरूको सुरक्षाको अवस्थाबारे पनि समीक्षा गरिएको छ।

स्थलगत निरीक्षणमा गेजिङका एसडीएम भवेश ख्यालिया, जिल्ला आपदा प्रबन्धन प्राधिकरणका डीपीओ गणेश कुमार राई, युक्समका भूमि राजस्व तथा आपदा प्रबन्धन विभागका राजस्व अधिकारी अमृत राज राई, सडक विभागका अभियन्ता सन्तोष सिंह, पञ्चायत अध्यक्ष मंगल राईसहित रिम्बी गाउँका स्थानीय बासिन्दाहरूको सहभागिता रहेको थियो।

हालको भौगोलिक अवस्थालाई ध्यानमा राख्दै तथा थप पैह्रो जान सक्ने सम्भावनालाई मध्यनजर गरी जिल्ला प्रशासनले प्रभावित तथा जोखिममा रहेका परिवारको सुरक्षा र अस्थायी बसोबासका लागि जीपीके रिम्बी तिम्ब्रुङमा राहत शिविर स्थापना गर्ने निर्णय गरेको छ। राहत शिविरमा राज्य आपदा प्रतिकार्य बलका निर्धारित निर्देशिका तथा लागू राहत मापदण्डअनुसार आवश्यक राहत सामग्री र अन्य अत्यावश्यक वस्तु उपलब्ध गराइनेछ।

जिल्ला प्रशासनले अवस्थाको निरन्तर निगरानी गरिरहेको जनाएको छ। आवश्यकता अनुसार सावधानी तथा प्रतिकार्यका आवश्यक उपायहरू अपनाइनेछ। प्रशासनले स्थानीय बासिन्दालाई सतर्क रहन तथा जिल्ला प्रशासनद्वारा जारी निर्देशन पालना गर्न आग्रह गरेको छ।

हिन्दुस्थान समाचार / बिशाल