सोरेङ, १८ सेप्टेम्बर (हि.स.)। सोरेङ जिल्लामा पन्ध्रौँ वित्त आयोगअन्तर्गत स्वास्थ्य क्षेत्र अनुदान प्रशासनसम्बन्धी जिल्ला स्तरीय समितिको समीक्षा बैठक शुक्रबार जिल्लापाल कार्यालयमा सम्पन्न भयो। बैठकको अध्यक्षता जिल्लापाल धीरज सुबेदीले गरेका थिए।
बैठकमा पन्ध्रौँ वित्त आयोगअन्तर्गत प्राप्त स्वास्थ्य क्षेत्र अनुदानको जिल्लामा भइरहेको कार्यान्वयन तथा प्रगतिबारे समीक्षा गर्दै प्रस्तावित कार्ययोजना, अनुगमन प्रणाली र विभिन्न शीर्षकअन्तर्गत विनियोजित रकमको प्रभावकारी उपयोगबारे छलफल गरिएको थियो।
डीएनडब्ल्यु डा. इडेन जेड. भोटियाले प्रस्तुतीकरणमार्फत स्वास्थ्य क्षेत्र अनुदानको वित्तीय तथा कार्यान्वयन अवस्थाबारे समितिलाई जानकारी गराइन्। उनले शहरी तथा ग्रामीण क्षेत्रमा औषधि, गुणस्तर सुनिश्चितता, अनुगमन, क्षमता विकास, टोलीमा आधारित प्रोत्साहन, स्वास्थ्य प्रवर्द्धन गतिविधि, दूरचिकित्सा सेवा, सूचना-शिक्षा-सञ्चारलगायत विभिन्न गतिविधिको प्रगतिबारे जानकारी दिइन्।
बैठकमा रिन्चेनपोङ प्राथमिक स्वास्थ्य केन्द्रमा खण्ड सार्वजनिक स्वास्थ्य एकाइ स्थापना गर्ने प्रस्तावसहित पूर्वाधार, खण्डस्तरीय सार्वजनिक स्वास्थ्य प्रयोगशाला, प्रयोगशाला उपकरण, स्वास्थ्य व्यवस्थापन सूचना प्रणाली तथा मङ्गलबारेमा सञ्चालनमा रहेको खण्ड सार्वजनिक स्वास्थ्य एकाइका नियमित आवश्यकतासम्बन्धी कार्ययोजनामाथि पनि छलफल भयो।
उपस्वास्थ्य केन्द्र तथा प्राथमिक स्वास्थ्य केन्द्रलाई स्वास्थ्य तथा आरोग्य केन्द्रमा रूपान्तरण गर्ने कार्यअन्तर्गत सूचना-शिक्षा-सञ्चार, सूचना प्रविधि सहयोग, अनुगमन तथा निरीक्षणलगायत प्रस्तावित गतिविधिबारे पनि छलफल गरिएको थियो।
स्वास्थ्य संस्थाको जिल्ला तथा खण्डस्तरीय अनुगमन प्रणालीका सम्बन्धमा जिल्ला पञ्चायत, जिल्ला प्रशासन, स्वास्थ्य विभाग तथा सम्बन्धित अन्य विभागका प्रतिनिधि सम्मिलित टोली गठन तथा उनीहरूको जिम्मेवारीबारे समितिलाई जानकारी गराइयो।
बैठकमा जिल्लाभर सञ्चालनमा रहेका प्राथमिक स्वास्थ्य केन्द्र, उपस्वास्थ्य केन्द्र, स्वास्थ्य तथा आरोग्य केन्द्र र सिङ्लिङस्थित शहरी स्वास्थ्य तथा आरोग्य केन्द्रको अवस्थाबारे पनि जानकारी दिइएको थियो।
जिल्लापाल धीरज सुबेदीले बैठकमा भएका निर्णयको प्रभावकारी कार्यान्वयन तथा आवश्यक अनुगमन र समन्वय सुनिश्चित गर्न सम्बन्धित विभाग तथा अधिकारीहरूलाई निर्देशन दिए। उनले उपलब्ध स्रोतसाधनको उचित उपयोगसँगै नियमित अनुगमन र निर्णयको प्रभावकारी कार्यान्वयनमा जोड दिए।
---------------
हिन्दुस्थान समाचार / बिशाल
18 Sep 2026