न्यूयोर्क, २३ सेप्टेम्बर (हि.स.)। अमेरिकी राष्ट्रपति डोनाल्ड ट्रम्पले मंगलबार संयुक्त राष्ट्र महासभाको अवसरमा इरानी अधिकारीहरूले अमेरिकाका विशेष दूत स्टिभ विटकफसँग तीन घण्टासम्म वार्ता गरेको बताएका छन्। उनले छिट्टै अर्को बैठक हुने जानकारी दिएका छन्। विटकफले पनि बैठक सकारात्मक रहेको बताएका छन्। जून महिनामा स्विट्जरल्यान्डमा अमेरिकी उपराष्ट्रपति जेडी भेन्स र इरानी प्रतिनिधिमण्डलबीच सम्झौता ज्ञापनपत्रमा सहमति जुटाउन भएको भेटपछि यो पहिलो बैठक हो।

द गार्जियनको रिपोर्टअनुसार, विटकफसँग भएको बैठकमा इरानका विदेशमन्त्री अब्बास अरागची सहभागी थिए भने कतारका कूटनीतिज्ञहरूले वार्तामा मध्यस्थता गरेका थिए। इरानका एक वरिष्ठ अधिकारीले इरान एक साताभित्र होर्मुज जलडमरूमध्य पुनः खोल्न तयार रहेको संकेत दिएका छन्। उनका अनुसार, अमेरिकाले इरानमाथिको सैन्य तथा आर्थिक दबाउ कम गर्न सहमति जनाएमा सहमति जुट्न सक्नेछ।

यसअघि इरानले होर्मुज जलडमरूमध्य खोल्न सातवटा कडा सर्त अघि सारेको थियो। तीमध्ये सबै मोर्चामा अमेरिकी युद्ध अन्त्य गर्नुपर्ने तथा प्रतिबन्धसहित इरानविरुद्धका सबै आक्रामक कारबाही रोक्नुपर्ने माग प्रमुख थिए।

यसैबीच, एक इरानी अधिकारीले जापानी समाचार संस्था क्योडो न्यूजलाई नयाँ अडान तीमध्ये केही सर्तमा लचकता अपनाउने विषयसँग सम्बन्धित रहेको बताएका छन्। उनका अनुसार, यो अडानलाई इरानका सर्वोच्च नेता मोजतबा खामेनेई तथा देशको सर्वोच्च राष्ट्रिय सुरक्षा परिषद्ले स्वीकृति दिइसकेको छ। यद्यपि, इस्लामिक रिभोल्युसनरी गार्ड्स कर्प्स (आईआरजीसी) निकट मानिने प्रमुख इरानी सञ्चारमाध्यमहरूले कुनै नयाँ अडान अपनाइएको कुरालाई अस्वीकार गरेका छन्।

हिन्दुस्थान समाचार / बिशाल