गान्तोक, 23 सेप्टेम्बर (हि.स.)। भारतीय जनता पार्टी (भाजपा) सिक्किम एकाइले दार्जिलिङका सांसद राजु बिष्टलाई भाजपा सिक्किमको राज्य प्रभारी नियुक्त गरिएकोमा हार्दिक बधाई तथा स्वागत व्यक्त गरेको छ। भाजपाको राष्ट्रिय नेतृत्वले संगठनात्मक पुनर्संरचनाअन्तर्गत गरेको नियुक्तिसँगै सिक्किममा पार्टीको संगठनात्मक जिम्मेवारी र गतिविधिमा नयाँ गति आउने अपेक्षा गरिएको छ।
भाजपा सिक्किमका प्रदेश अध्यक्ष डीआर थापाले राजु बिष्टलाई हार्दिक बधाई दिँदै उनको समृद्ध संगठनात्मक अनुभव, युवा ऊर्जा तथा जनसेवाप्रतिको प्रतिबद्धताले राज्यभर पार्टी संगठनलाई थप सुदृढ बनाउन सहयोग पुग्ने विश्वास व्यक्त गरेका छन्। भाजपा सिक्किमले राजु बिष्टलाई स्वागत गर्दै उनको मार्गदर्शनमा एकता, समर्पण र नयाँ संगठनात्मक ऊर्जाका साथ काम गर्दै सिक्किमभर पार्टीलाई प्रत्येक तहमा थप सुदृढ बनाउने प्रतिबद्धता व्यक्त गरेको छ।
राज्य एकाइले प्रधानमन्त्री नरेन्द्र मोदीको नेतृत्व तथा भाजपा राष्ट्रिय अध्यक्ष नितिन नबीनको मार्गदर्शनमा सामूहिक रूपमा काम गर्दै राज्यभर संगठन र तल्लो तहसम्मको उपस्थितिलाई निरन्तर सुदृढ बनाउने प्रतिबद्धता पनि दोहोर्याएको छ।
यसैबीच, भाजपा सिक्किमले निवर्तमान राज्य प्रभारी डा. दिलीप जायसवालप्रति पनि हार्दिक आभार व्यक्त गरेको छ। विगतका वर्षहरूमा उनले दिएको समर्पित मार्गदर्शन र नेतृत्वले संगठनलाई सुदृढ बनाउन, कार्यकर्ताहरूलाई तयार पार्न तथा सिक्किमभर पार्टीको संगठनात्मक उपस्थिति विस्तार गर्न महत्वपूर्ण योगदान पुर्याएको भाजपा सिक्किमले जनाएको छ। पार्टीले उनका आगामी संगठनात्मक जिम्मेवारीहरूमा निरन्तर सफलताको शुभकामना व्यक्त गरेको छ।
हिन्दुस्थान समाचार / बिशाल
