मङ्गन, 06 सेप्टेम्बर (हि.स.)। उत्तर सिक्किम अन्तर्गत मङ्गन जिल्लाको चुङथाङ क्षेत्रमा ५ र ६ सेप्टेम्बरको मध्यरातमा गएको पैह्रोका कारण टिस्टा नदी र च्याकूङ नदीको बहाव आंशिक रूपमा प्रभावित भएको छ। घटनापछि जिल्ला प्रशासन र पुलिस प्रशासनले नदी क्षेत्र तथा पैह्रोस्थलमा निगरानी बढाएको छ।

मङ्गन जिल्ला प्रशासनले आइतबार बिहान जानकारी गराएअनुसार, जिल्ला पुलिस र चुङथाङ महकुमाले ५ र ६ सेप्टेम्बरको मध्यरातमा ओसी भिरको विपरीततर्फ च्याकुङ नदीमाथि रहेको क्षेत्रमा पैह्रो गएको सूचना प्राप्त भयो। पैह्रोका कारण नागा वन क्षेत्रअन्तर्गत नयाँ नागा-तोसा सडक निर्माणका क्रममा काटिएको पहाडको ठूलो हिस्सा थेङ टनेलको विपरीततर्फ टिस्टा र च्याकूङ नदीको संगम नजिकै खसेको छ।

पैह्रोले दुवै नदीको बहावमा आंशिक अवरोध उत्पन्न भएको छ भने टिस्टा नदीको बहाव केही समयका लागि अवरुद्ध भएको थियो। यद्यपि, हाल टिस्टा नदीको बहाव सामान्य रहेको जिल्ला प्रशासनले जनाएको छ। टिस्टा र च्याकूङ दुवै नदीमा पानी जमेको भए पनि दुवै नदीबाट पानी आंशिक रूपमा बगिरहेको छ।

हालसम्म मानवीय क्षति वा कोही घाइते भएको जानकारी प्राप्त भएको छैन। पैह्रोका कारण सम्पत्तिमा क्षति पुगेको वा नपुगेको विषयमा जिल्ला प्रशासनले स्थलगत मूल्याङ्कन गरिरहेको छ। चुङथाङ चेक पोस्ट/पुलिस स्टेशनका एसएचओ तथा थेङ चेक पोस्टमा खटिएका पुलिस कर्मचारीहरूले घटनास्थलको अवस्थालाई निरन्तर निगरानी गरिरहेका छन्।

यसैबीच, साङ्कलाङ आउट पोस्ट र फिदाङ आउट पोस्ट क्षेत्रमा नदीको पानीको सतह हाल सामान्य रहेको बताइएको छ। यद्यपि, नदीको पानी धमिलो देखिएको छ। दुवै स्थानका सम्बन्धित अधिकारीहरूलाई नदीको पानीको सतहमा निरन्तर निगरानी राख्न तथा कुनै उल्लेखनीय परिवर्तन देखिएमा तत्काल जानकारी गराउन निर्देशन दिइएको छ।

सावधानीका रूपमा तल्लो क्षेत्रमा रहेका जोखिमयुक्त स्थानहरूलाई सतर्क गराउन पुलिस नियन्त्रण कक्षलाई समेत जानकारी गराइएको छ। मङ्गन जिल्ला प्रशासनले पैह्रो गएको क्षेत्रका साथै टिस्टा नदी छेउछाउको सम्पूर्ण क्षेत्रमा निरन्तर निगरानी गरिरहेको जनाएको छ। घटनास्थलको विस्तृत मूल्याङ्कनपछि थप विवरण सार्वजनिक गरिने जिल्ला प्रशासन केन्द्रले जनाएको छ।

उल्लेखनीय छ, अक्टोबर २०२३ मा उत्तर सिक्किमको दक्षिण ल्होनाक हिमताल फुटेपछि आएको भीषण बाढीले टिस्टा नदीको तल्लो तटीय क्षेत्रमा ठूलो जनधन तथा पूर्वाधारमा क्षति पुर्‍याएको थियो। त्यस घटनापछि टिस्टा नदीको बहावमा हुने कुनै पनि असामान्य परिवर्तनलाई विशेष संवेदनशीलताका साथ निगरानी गर्ने गरिएको छ।

मङ्गनमा गएको पैह्रोले टिस्टा र च्याकूङ नदीको बहावमा आंशिक अवरोध सिर्जना गरेपछि तल्लो तटीय क्षेत्रमा थप सतर्कता अपनाइएको हो। हाल नदीको बहाव सामान्य रहेको जनाइए पनि पानी जम्ने तथा बहावमा अचानक परिवर्तन आउन सक्ने सम्भावनालाई मध्यनजर गर्दै सम्बन्धित निकायहरूलाई निरन्तर निगरानी गर्न निर्देशन दिइएको छ।

हिन्दुस्थान समाचार / बिशाल