सागर, ६ सेप्टेम्बर (हि.स.)। मध्य प्रदेशको सागर जिल्लाको बण्डा तहसीलअन्तर्गत छेउछाउका केही गाउँमा विषाक्त मदिरा सेवन गर्दा ६ जनाको मृत्यु भएको छ। आइतबार बिहान सबैलाई बण्डा सिभिल अस्पताल ल्याइएको थियो, जहाँ चिकित्सकले जाँचपछि उनीहरूलाई मृत घोषित गरेका थिए।

सागरकी कलेक्टर प्रतिभा पाल, एसपी अनुराग सुजानियासहित सम्पूर्ण जिल्ला प्रशासन र पुलिस टोली घटनास्थलमा पुगेको छ। प्रशासनिक अधिकारीहरूले घटनास्थलको निरीक्षण गरी अवस्थाको जायजा लिइरहेका छन् भने पीडित परिवारबाट आवश्यक जानकारी संकलन गरिरहेका छन्।

कलेक्टर प्रतिभा पालले पछिल्लो २४ देखि ४८ घण्टाभित्र कुनै पनि प्रकारको मदिरा सेवन गरेका व्यक्ति वा विषाक्त मदिरा सेवनका लक्षण देखिएका व्यक्तिलाई तत्काल स्वास्थ्य परीक्षण गराउन अपील गरेकी छन्। उनले स्थानीय चिकित्सकको टोलीसँग सम्पर्क गर्न वा सिधै सिभिल अस्पताल पुगेर जाँच गराउन सकिने बताएकी छन्।

यी व्यक्तिहरूको भयो मृत्यु

पुलिसका अनुसार, गोलू उर्फ चमन लोधी (45), निवासी गूगरा खुर्द, दिग्विजय लोधी (28), निवासी नौराज, करतार सिंह लोधी (30), निवासी नौराज, उजियार सिंह लोधी (56), निवासी गूगरा खुर्द, रोशन लोधी (30), निवासी पाटन थाना विनायका र राजेन्द्र लोधी (32), निवासी नौराज-गूगराको मृत्यु भएको छ। गोलु उर्फ चमनलाई यसअघि नै क्यान्सरको समस्या रहेको जानकारीसमेत अघि आएको छ।

पाँच बिरामी बीएमसी सागर रेफर

हरनाम राय (42), निवासी चौका, उत्तम नत्थू नायक (42), निवासी दलपतपुर, मंगल रजक (40), निवासी गूगरा खुर्द, परम आदिवासी, निवासी हिनौता र धनसिंह आदिवासी (30), निवासी हिनौतालाई गम्भीर अवस्थामा थप उपचारका लागि बीएमसी सागर रेफर गरिएको छ। कानून–व्यवस्था कायम राख्न बण्डामा अतिरिक्त पुलिस बल तैनाथ गरिएको छ।

स्थानीय स्रोत तथा मदिरा ठेकेदारहरूका अनुसार, घटनापछि आबकारी विभागको गम्भीर लापरवाहीमाथि प्रश्न उठेको छ। हालै शहरका एक लाइसेन्सप्राप्त मदिरा ठेकेदारले आबकारी कार्यालयमा नक्कली तथा अवैध मदिरा बिक्री भइरहेको सम्बन्धमा उजुरी गरेका थिए। यसबाहेक आबकारी विभागको हालै सम्पन्न बैठकमा समेत लाइसेन्सप्राप्त ठेकेदारहरूले अवैध मदिराको कारोबारलाई लिएर अधिकारीहरूसमक्ष कडा आपत्ति जनाएका थिए।

यद्यपि, त्यसपछि पनि विभागले समयमै कुनै ठोस कदम नचालेको र त्यसको खामियाजा ६ जना निर्दोष ग्रामीणले ज्यान गुमाएर भोग्नुपरेको आरोप लगाइएको छ।

हिन्दुस्थान समाचार / भवानी थामी