काठमाडौं, २२ अक्टोबर (हि.स.)। पूर्व प्रधानमन्त्री केपी शर्मा ओलीको पार्टीसँग सम्बन्धित एक कार्यकर्तालाई पूर्व राष्ट्रपति विद्यादेवी भण्डारीको निजी निवासमा आगजनी गरेको आरोपमा पुलिसले पक्राउ गरेको छ। ‘जेन जी’ प्रदर्शनका क्रममा अन्य नेताहरूको साथमा पूर्व राष्ट्रपतिको घरमा आगजनी गरिएको थियो। घटनाको समयमा पूर्व राष्ट्रपति भण्डारी घरमै उपस्थित थिइन्।
पक्राउ परेका व्यक्ति सोनाम थेबे हुन्, जो हाल काठमाडौंको धुम्बाराहीमा बसोबास गर्दै आएका थिए। काठमाडौं पुलिसले जनाए अनुसार, उनी ओली नेतृत्वको पार्टीको युवा संगठन ‘युवा संघ’ का सक्रिय कार्यकर्ता हुन्।
काठमाडौं पुलिस प्रवक्ता एसपी पवन भट्टराईका अनुसार, थेबेलाई सोमबार महाराजगञ्ज क्षेत्रबाट पक्राउ गरिएको हो। उनलाई हाल जिल्ला पूलिस परिसरमा राखिएको छ र छठ पर्वपछि अदालत खुलेपछि उनको रिमाण्ड लिइने बताइएको छ।
एसपी भट्टराईका अनुसार, प्रारम्भिक अनुसन्धानले देखाएको छ कि थेबेले पूर्व राष्ट्रपति भण्डारीको घरमा गरिएको आगजनीमा अग्रणी भूमिका खेलेका थिए। उनले भने, “थेबेको आपराधिक पृष्ठभूमि रहेको छ र यसबारे थप अनुसन्धान भइरहेको छ।”
भट्टराईले पुष्टि गरे अनुसार, सोनाम थेबे पहिले नै नेकपा (एमाले) पार्टीसँग आबद्ध थिए र पार्टीका कार्यक्रमहरूमा सक्रिय रूपमा सहभागी हुन्थे। उनीमाथि सार्वजनिक अपराध, तोडफोड र आगजनीका मुद्दामा अनुसन्धान भइरहेको छ।
त्यसबाहेक, थेबेले धम्की र जबरजस्तीका माध्यमबाट धुम्बाराही क्षेत्रका होटल व्यवसायी, नाइटलाइफ व्यवसाय सञ्चालक र जग्गा दलालहरूबाट पैसा असुलेको आरोप पनि लागेको छ।
उल्लेखनीय छ, राष्ट्रपति बन्नुअघि विद्यादेवी भण्डारीले ओलीको पार्टीमा उपाध्यक्षको रूपमा काम गरेकी थिइन्। ओलीकै सिफारिसमा उनी राष्ट्रपतिका उम्मेदवार बनेकी थिइन्। विद्यादेवी भण्डारी दुई कार्यकालसम्म नेपालकी राष्ट्रपति रहिन्। दुई कार्यकाल पूरा गरेपछि उनले पुनः एमाले राजनीतिमा सक्रियता देखाएकी थिइन्, जसपछि ओलीसँग उनका मतभेद खुलेर देखा परेका छन्। भण्डारीले पार्टी सदस्यता पुनः लिँदा ओलीले उनको सदस्यता रद्द गर्दै राजनीतिक गतिविधिमा सहभागी हुन रोक लगाएका छन्।
--------------
हिन्दुस्थान समाचार / भवानी थामी
