गान्तोक, 25 अक्टूबर (हि.स.)। सिक्किमका बक्सरहरू अरुणाचल प्रदेशको इटानगरमा हुने 69औं राष्ट्रिय विद्यालय खेल संघ 2025 मा भाग लिन तयार छन्। राज्य खेलकुद एवं युवा मामिला विभागले उक्त प्रतियोगिता (अण्डर-17) को लागि 13 जना युवा बक्सरहरूको राज्य टोली छनोट गरेको छ, जसमा 10 जना केटा र 3 जना केटी सामेल छन्।
उक्त प्रतियोगिता आगामी 28 अक्टोबरदेखि 3 नोभेम्बर, 2025 सम्म अरुणाचल प्रदेशको इटानगरमा आयोजना हुनेछ। टोलीसँग दुई जना प्रशिक्षक र एक जना प्रबन्धक पनि रहनेछन्, जसले खेलाडीहरूलाई मार्गदर्शन र सहयोग गर्नेछन्।
यो गौरवमय उपलब्धि सिक्किम राज्य खेल विकास बोर्डका अध्यक्ष रिन्जिङ वाङ्ग्याल छोपेलको निरन्तर समर्थन, प्रेरणा र मार्गदर्शनका साथै खेलकुद एवं युवा मामिला विभागकी सचिव याङछेन डोमा तामाङ, अतिरिक्त निर्देशक आरबी विश्वकर्म, संयुक्त निर्देशक जिग्मी वाई. लेप्चा, सम्पूर्ण अधिकारीहरू र प्रशिक्षकहरूको प्रतिबद्ध प्रयासले सम्भव भएको विभागले बताएको छ।
यस अतिरिक्त, सिक्किमका पाँच जना अधिकारीहरू पनि उक्त प्रतियोगितामा निर्णायकको रूपमा चयन भएका छन्, जसले राष्ट्रिय स्तरमा सिक्किमको योगदान र पहिचानलाई अझ मजबुत बनाउने बताइएको छ। विभागले सम्पूर्ण सहभागी बक्सरहरू, प्रशिक्षकहरू, प्रबन्धक तथा अधिकारीहरूलाई प्रतियोगितामा उत्कृष्ट प्रदर्शन र सफलता प्राप्तिको लागि हार्दिक शुभकामना व्यक्त गरेको छ।
हिन्दुस्थान समाचार / बिशाल
