नयाँ दिल्ली, 03 अप्रेल (हि.स.)। प्रधानमन्त्री नरेन्द्र मोदी आज बिहान थाइल्याण्डको राजधानी ब्याङ्कक प्रस्थान गरेका छन्। उनी ब्याङ्ककको होटल साङ्ग्रिलामा आयोजना हुने बिमस्टेक (बंगालको खाड़ी बहु-क्षेत्रीय तकनीकी एवं आर्थिक सहयोग पहल) शिखर सम्मेलनमा भाग लिनेछन्। यस वर्ष शिखर सम्मेलनको आयोजना थाइल्याण्डले गरिरहेको छ।

ब्याङ्कक जानुअघि जारी विज्ञप्तिमा प्रधानमन्त्री मोदीले भने, 'म आज थाइल्याण्डको औपचारिक भ्रमणमा जाँदैछु र छैटौं बिमस्टेक शिखर सम्मेलनमा भाग लिनेछु। विगत एक दशकमा, बिमस्टेक बंगालको खाडी क्षेत्रमा क्षेत्रीय विकास, कनेक्टिभिटी र आर्थिक प्रगतिलाई प्रवर्द्धन गर्न एक महत्त्वपूर्ण मञ्चको रूपमा देखा परेको छ। यसको भौगोलिक स्थानको साथ भारतको उत्तरपूर्वी क्षेत्र बिमस्टेकको केन्द्रमा छ। म बिमस्टेक देशका नेताहरूसँग भेट्न र देशका जनताको हितलाई ध्यानमा राख्दै सहयोगलाई अझ सुदृढ पार्न तत्पर छु।'

प्रधानमन्त्रीले भने, 'मेरो आधिकारिक भ्रमणको क्रममा मलाई थाइल्याण्डका प्रधानमन्त्री पेतोंगतार्न शिनावात्रा र थाई नेतृत्वसँग हाम्रो शताब्दी पुरानो ऐतिहासिक सम्बन्धलाई बढाउने साझा इच्छाको बारेमा अन्तरक्रिया गर्ने अवसर मिल्नेछ, जुन साझा संस्कृति, दर्शन र आध्यात्मिक मूल्यमान्यताको बलियो जगमा आधारित छ। थाइल्याण्डबाट म 04-06 अप्रेलसम्म श्रीलंकाको दुई दिने भ्रमणमा जाँदैछु। हामीसँग साझा भविष्यका लागि साझेदारीलाई बढावा दिने हाम्रो संयुक्त दृष्टिकोणमा भएको प्रगतिको समीक्षा गर्ने र हाम्रा साझा उद्देश्यहरू प्राप्त गर्न थप मार्गदर्शन प्रदान गर्ने अवसर हुनेछ। मलाई विश्वास छ कि यी भ्रमणहरूले हाम्रा जनता र बृहत् क्षेत्रको हितका लागि हाम्रो घनिष्ठ सम्बन्धलाई सुदृढ पार्न योगदान पुर्‍याउनेछन्।'

थाइल्याण्डको समाचार पत्र द नेसनको समाचार अनुसार, प्रधानमन्त्री कार्यालयका प्रवक्ता जिरायु हुआङसेपले भने, 'भारतीय प्रधानमन्त्री मोदी थाइल्याण्डका प्रधानमन्त्री पेतोंगतार्न शिनावात्राको निमन्त्रणामा (3-4 अप्रेल) थाइल्याण्डको औपचारिक भ्रमणमा आइपुग्दैछन्। प्रधानमन्त्री पेतोंगतार्नले 3 अप्रेलमा गभर्नमेन्ट हाउसमा आफ्ना भारतीय समकक्षीलाई औपचारिक रूपमा स्वागत गर्नेछन्। यसपछि, दुवै नेताले प्रतिनिधिमण्डलसँगको भेटमा छलफल गर्नेछन्। यसपछि एमओयूमा हस्ताक्षर हुनेछ। यस अवसरमा संयुक्त पत्रकार सम्मेलन हुनेछ। दिउँसो 1 बजीतिर थाइल्याण्डका प्रधानमन्त्रीले भारतीय प्रधानमन्त्रीको सम्मानमा दिवाभोजको आयोजना गर्नुहुनेछ।'

हिन्दुस्थान समाचार / भवानी थामी