अहमदाबाद, 13 जून (हि.स.)। गुजरातको अहमदाबादमा हिजो दिउँसो भएको हृदयविदारक विमान दुर्घटनामा 241 जनाको मृत्यु भएको एयर इन्डियाले पुष्टि गरेको छ। दुर्घटनाको आधिकारिक कारण अझै थाहा भएको छैन। उद्धार कार्यमा संलग्न राष्ट्रिय आपदा प्रतिक्रिया बल (एनडीआरएफ) ले आज बिहान करिब 3 बजीसम्म 81 भन्दा बढी शव निकालिएको जनाएको छ। घटनास्थलमा 10 टोली तैनाथ छन्। दुर्घटनाग्रस्त विमान एयर इन्डियाको '171 बोइङ 787-8' हो। सरदार वल्लभभाई पटेल अन्तरराष्ट्रिय विमानस्थलबाट लन्दनको लागि उडान भरेको केही समयपछि नै विमान दुर्घटनाग्रस्त भएको थियो।

प्रधानमन्त्री नरेन्द्र मोदीले आज घटनास्थलको भ्रमण गर्ने अपेक्षा गरिएको छ। यसअघि हिजो केन्द्रिय गृहमन्त्री अमित शाह अहमदाबाद पुगेका थिए। उनले मुख्यमन्त्री भूपेन्द्र पटेलबाट घटनाको बारेमा विस्तृत जानकारी लिए। घटनास्थलको पनि भ्रमण गरे। यस अवसरमा शाहले करिब 1000 डीएनए परीक्षण गर्नुपर्ने बताए। उनले 10 मिनेटपछि दुर्घटनाको जानकारी पाएको बताए। यसपछि उनले तुरुन्तै प्रधानमन्त्री, गुजरातका गृहमन्त्री, गृह विभाग नियन्त्रण कक्ष, नागरिक उड्डयन विभाग र नागरिक उड्डयन मन्त्रीलाई जानकारी गराए। प्रधानमन्त्रीले तुरुन्तै फोन गरे। यसपछि, केन्द्र र राज्य सरकारका कर्मचारीहरू राहत र उद्धार कार्यमा संलग्न भए।

केन्द्रिय नागरिक उड्डयन मन्त्री राम मोहन नायडूले विमान दुर्घटना अनुसन्धान ब्यूरो (एसएसआईबी) ले औपचारिक अनुसन्धान शुरु गरेको पुष्टि गरे। विमान दुर्घटना अनुसन्धान ब्यूरो नागरिक उड्डयन मन्त्रालयको एक विभाग हो। एसएसआईबीले देशमा हुने विमान दुर्घटनाहरूको अनुसन्धान गर्ने जिम्मेवारी सम्हाल्दछ।

नायडूले एक्समा लेखेका छन्, 'एएआईबीले अन्तरराष्ट्रिय नागरिक उड्डयन संगठन (आईसीएओ) को अन्तरराष्ट्रिय प्रोटोकल अनुसार औपचारिक अनुसन्धान शुरु गरेको छ। मन्त्री नायडूले सरकारले विस्तृत अनुसन्धान गर्न विभिन्न विषयका विज्ञहरू सम्मिलित उच्चस्तरीय समिति गठन गरिरहेको बताए। यसैबीच, संयुक्त राज्य अमेरिकामा हवाई दुर्घटनाहरूको अनुसन्धान गर्न कंग्रेसद्वारा अधिकृत निकाय राष्ट्रिय परिवहन सुरक्षा बोर्ड (एनटीएसबी) ले भारतमा अनुसन्धानकर्ताहरूलाई सहयोग गर्न एक टोली पठाउने घोषणा गरेको छ।

एयर इन्डियाले मध्यरातपछि बोइङ 787-8, एयर इन्डिया फ्लाइट 171 मा सवार 241 जनाको दुर्घटनामा मृत्यु भएको पुष्टि गरेको छ, जसमा 12 जना चालक दलका सदस्यहरू पनि थिए। बाँचेका एक मात्र व्यक्तिको अस्पतालमा उपचार चलिरहेको छ। 12 जून, 2025 मा अहमदाबादबाट लन्दन ग्याटविकका लागि उडान भरेको उक्त उडानमा 169 भारतीय नागरिक, 53 बेलायती नागरिक, सात पुर्तगाली नागरिक र एक क्यानेडियन नागरिक सवार थिए।

टाटा समूहको स्वामित्वमा रहेको एयरलाइनले थप जानकारी प्रदान गर्न एक समर्पित यात्रु हटलाइन नम्बर, 1800 5691 444 स्थापना गरेको छ। देश बाहिरबाट फोन गर्नेहरूले +91 8062779200 मा सम्पर्क गर्न सक्छन्। बाँचेका व्यक्ति भारतीय मूलका बेलायती नागरिक भएको बताइएको छ। विमान क्याप्टेन सुमित सभरवालले उडाइरहेका थिए। 8,200 घण्टा उडान अनुभव भएका सुमित लाइन ट्रेनिङ क्याप्टेन हुन्। उनलाई प्रथम अधिकारी क्लाइभ कुन्दरले सहयोग गरिरहेका थिए, जससँग 1,100 घण्टा उडान अनुभव थियो।

एयर ट्राफिक कन्ट्रोल (एटीसी) का अनुसार, विमानले अहमदाबादबाट 1339 भारतीय समय (0809 यूटीसी) मा रनवे 23 बाट उडान भरेको थियो। यसले एटीसीमा मेडे कल गर्‍यो। त्यसपछि, विमानले एटीसी कलहरूको जवाफ दिएन। रनवे 23 बाट उडान भरेको केही समयपछि विमानस्थलको परिधि बाहिर जमिनमा दुर्घटनाग्रस्त भयो। टाटा समूहले दुर्घटनामा ज्यान गुमाउने प्रत्येक व्यक्तिको परिवारलाई 1 करोड रुपियाँ क्षतिपूर्ति दिने घोषणा गरेको छ।

हिन्दुस्थान समाचार / भवानी थामी