गान्तोक, 09 जून (हि.स.)। भारतीय जनता पार्टी (भाजपा) सिक्किमले 2023 को ग्लेशियल लेक आउटबर्स्ट फ्लड (जीएलओएफ) र त्यसपछि 2024 र 2025 को मनसुनमा पैह्रो गएको कारणले भएको विनाशलाई ध्यानमा राख्दै प्रधानमन्त्री नरेन्द्र मोदीलाई मंगन जिल्ला र राज्यका अन्य गम्भीर रूपमा प्रभावित क्षेत्रहरूको लागि तत्काल केन्द्रिय हस्तक्षेप र विशेष सहयोगको माग गर्दै हार्दिक निवेदन पेश गरेको छ। यस हप्ताको शुरुमा भाजपा टोलीले हालैका विपत्तिहरूबाट भएको विनाशको वास्तविकता मूल्याङ्कन गर्न जिल्लाको भ्रमण गरेको बताइएको छ।
प्रदेश भाजपा मिडिया प्रभारी निरेन भण्डारीद्वारा आज जारी विज्ञप्तिमा भनिएको छ, भाजपा सिक्किम अध्यक्ष डीआर थापाद्वारा हस्ताक्षर गरिएको ज्ञापनपत्रमा उत्तरी सिक्किममा गम्भीर मानवीय, आर्थिक र रणनीतिक संकटको रूपरेखा प्रस्तुत गरिएको छ। यसमा जीवनको क्षति, पुल, सडक र जलविद्युत परियोजनाहरू जस्ता महत्वपूर्ण पूर्वाधारहरूको विनाश, र यस क्षेत्रमा पर्यटन र जीविकोपार्जन पूर्ण रूपमा ध्वस्त भएको उल्लेख गरिएको छ।
भाजपा सिक्किमले प्रधानमन्त्रीलाई 2023 को जीएलओएफ र त्यसपछिको अवस्थालाई राष्ट्रिय आपदा घोषणा गर्न आग्रह गरेको छ। यसैगरी, डोनर मन्त्रालय वा एनडीएमए अन्तर्गत विशेष पुनर्निर्माण र लचिलोपन प्याकेज, संयुक्त केन्द्र-राज्य कार्यदलको तैनाथी र उत्तर सिक्किम आपदा पुनर्वास प्राधिकरणको निर्माणको माग पनि गरेको छ।
यस अतिरिक्त, भाजपा सिक्किमले विस्थापित परिवारहरूको स्थायी पुनर्वास, ढलान स्थिरीकरण, तटबन्ध निर्माण कार्य, स्थानीय व्यवसायहरूको लागि ऋण पुनर्संरचना, र दीर्घकालीन कनेक्टिभिटी सुनिश्चित गर्न सेवक-रम्फू रेलवे लाइन र वैकल्पिक सडक कोरिडोरहरूको द्रुत निर्माण आदि मागहरू पनि राखेका छन्।
भाजपा सिक्किमले प्रधानमन्त्रीको नेतृत्व र विकसित भारतको दृष्टिकोणमा पूर्ण विश्वास व्यक्त गर्दै समयमै केन्द्रिय सहयोगले उत्तर सिक्किमका जनतालाई धेरै आवश्यक राहत, पुनर्वास र दीर्घकालीन लचिलोपन ल्याउने आशा गरेको छ।
हिन्दुस्थान समाचार / बिशाल
