नयाँ दिल्ली, २७ सेप्टेम्बर (हि.स.)। केन्द्रिय सडक यातायात तथा राजमार्ग मन्त्री नितिन गडकरीले हाल जंगलको केवल २० प्रतिशत मात्र पर्यटकका लागि खुला गरिएको र बाँकी ८० प्रतिशत वन्य क्षेत्र सुरक्षित राखिएको बताएका छन्। उनका अनुसार, वन्यजन्तु जीवनलाई हानि पुर्याउन नदिई जंगलको थप क्षेत्र पर्यटकका लागि खोलिने हो भने स्थानीय आदिवासीहरूको विकास र उन्नतिमा अझ टेवा पुग्नेछ।
गडकरीले शनिबार नयाँ दिल्लीमा आयोजित वन्यजन्तु फोटो प्रदर्शनीको उद्घाटन समारोहमा भने, नागपुर र वरिपरिको जंगल संरक्षण अति महत्त्वपूर्ण छ। नागपुर–जबलपुर राष्ट्रिय राजमार्गमा बाघहरूको सुरक्षा गर्न विशेष संरचना बनाइएको छ, जसमा सडक मुनि मार्ग र माथि जंगल जस्तै संरचना बनाईएको छ, जसले वन्य जीवन र सडक यातायातबीच सन्तुलन कायम राख्नेछ।
उनले भने, राजस्थान र महाराष्ट्रका जंगलहरूमा पर्यटनको अवसर विस्तार गरिएको छ र यसबाट स्थानीय आदिवासी युवाहरूलाई रोजगारी समेत प्रदान गरिएको छ। पर्यटन क्षेत्रमा विद्युतीय सवारीसाधनको प्रयोग बढाउन र प्रदूषण तथा ध्वनि नियन्त्रणका लागि सर्वोच्च अदालतको समितिबाट निर्देशनसमेत जारी गरिएको छ।
मन्त्री गडकरीले थपे, महाराष्ट्रको करिब ८० प्रतिशत वन्य क्षेत्र विदर्भमा अवस्थित छ। उनको निर्वाचन क्षेत्रलाई “टाइगर क्यापिटल” का रूपमा चिनिन्छ। यस क्षेत्रमा वन्यजन्तु संरक्षण र स्थानीय रोजगारी सृजनामा समान ध्यान दिइएको छ।
--------------
हिन्दुस्थान समाचार / भवानी थामी