गान्तोक, 06 जनवरी (हि.स.)। सिक्किमका लोकसभा सांसद डा. इन्द्रहाङ सुब्बाको अध्यक्षतामा आज पुडुचेरीमा उपभोक्ता मामिला, खाद्य तथा सार्वजनिक वितरण सम्बन्धी संसदीय समितिको अनौपचारिक बैठक सम्पन्न भयो। समितिका संयोजकको रूपमा सांसद सुब्बाले समितिकी अध्यक्ष के. कानिमोझीको पक्षमा बैठकको अध्यक्षता गरेको आज प्रेस विज्ञप्तिमा उल्लेख छ।
बैठकको क्रममा समितिले उपभोक्ता मामिला विभाग, पेट्रोलियम तथा प्राकृतिक ग्यास मन्त्रालय, तेल विपणन कम्पनीहरू र पुडुचेरी सरकारका प्रतिनिधिहरूसँग पेट्रोलियम तथा पेट्रोलियम उत्पादनहरूको सन्दर्भमा आवश्यक वस्तुहरूको उपलब्धता सुनिश्चित गर्ने उपायहरूको समीक्षा गर्न अन्तरक्रिया गर्यो। विशेष गरी मागको उतारचढाव वा आपतकालिन समयमा पेट्रोलियम र पेट्रोलियम उत्पादनहरूको निर्बाध उपलब्धता सुनिश्चित गर्न आपूर्ति संयन्त्र, वितरण प्रणाली र सरोकारवालाहरू बीच समन्वयको बारेमा विस्तृत छलफल गरियो।
डा. सुब्बाले रचनात्मक छलफललाई सहजीकरण गर्दै उपभोक्ता हितको रक्षा गर्न प्रभावकारी अन्तर-विभागीय समन्वय र सक्रिय योजनाको महत्त्वमा जोड दिए।
समितिले सबै सरोकारवालाहरूद्वारा साझा गरिएका सुझाउहरूको सराहना गर्दै आपूर्ति लचिलोपनलाई सुदृढ पार्न र उपभोक्ता कल्याण बढाउन केन्द्र सरकार, पुडुचेरी सरकार र तेल विपणन कम्पनीहरूबीच निरन्तर सहयोगको आवश्यकतामाथि जोड दिएको बताइएको छ।
हिन्दुस्थान समाचार / बिशाल
