पाकिम, 15 अक्टोबर (हि.स.)। सिक्किम राज्य सहकारी सङ्घ (सिकोन)ले बिहीवार पाकिमस्थित आसाम-लिङ्जेमा आफ्नो प्रेक्षगृहमा 15औँ वार्षिक आम सभा (एजीएम) आयोजन गरेको छ। यस सभामा राज्यभरिका विशिष्ट अतिथि, सञ्चालक समितिका सदस्य र सदस्य सहकारी संस्थाहरूका प्रतिनिधिहरूको उपस्थिति रहेको थियो। सभाले सङ्घका उपलब्धिहरूको समीक्षा गर्नुका साथै प्रमुख संस्थागत विषयहरूमाथि चर्चा गर्यो र सिक्किममा सहकारी अभियानलाई सुदृढ़ पार्न भविष्यका रणनीतिहरू तय गर्यो।
सिकोनका अध्यक्ष डा. मङ्गलजीत राईको अध्यक्षतामा सम्पन्न यस सभामा सिकोनका उपाध्यक्ष, सहकारी विभागका पञ्जीकार, सिस्को ब्याङ्कका प्रबन्ध निर्देशक, सिक्किम मिल्क युनियनका प्रमुख महाप्रबन्धक, सूचना तथा जनसम्पर्क विभागका उपनिर्देशकसहित अन्यको उपस्थिति रहेको थियो।
आफ्नो स्वागत सम्बोधनमा अध्यक्ष डा. राईले वार्षिक साधारण सभालाई सङ्घको कार्यसम्पादनको समीक्षा गर्ने, संस्थागत सुशासनलाई सुदृढ़ पार्ने र भविष्यका लागि प्राथमिकताहरू निर्धारण गर्ने एक महत्त्वपूर्ण मञ्चका रूपमा जोड़ दिए। उनले सङ्घको बढ्दो जिम्मेवारी र सहकारी क्षेत्रका परिवर्तित आवश्यकताहरूलाई सम्बोधन गर्न सिकोनको उपनियममा रहेका केही प्रावधानलाई अद्यावधिक गर्नुपर्ने आवश्यकतामाथि पनि प्रकाश पारे।
साधारण सभाले 5 सेप्टेम्बर, 2025 मा सम्पन्न 14औँ वार्षिक साधारण सभाको कार्यसूचीको निर्णय अभिलेख अनुमोदन गर्यो। आर्थिक वर्ष 2025-2026 को लेखापरीक्षण प्रतिवेदन र लेखापरीक्षण गरिएको हिसाबकिताबको विवरण प्रस्तुत गरियो र सदस्यहरूद्वारा अनुमोदन गरियो। उक्त वर्षमा तालिम, क्षमता अभिवृद्धि र अन्य संस्थागत गतिविधिमा युनियनले हासिल गरेका उपलब्धिहरूको पनि समीक्षा गरी अनुमोदन गरियो।
सदस्यहरूले आर्थिक वर्ष 2026-27 का लागि तालिम तालिकामाथि पनि चर्चा गरी अनुमोदन गरे। चर्चाका क्रममा ‘होप कोअपरेटिभ सोसाइटी’ का एक प्रतिनिधिले सहकारी विकास, ग्रामीण जीविकोपार्जन र समावेशी वृद्धिमा ग्रामीण महिलाहरूको योगदानको कदर गर्दै संयुक्त राष्ट्र सङ्घको ग्रामीण महिलाहरूको अन्तरराष्ट्रिय दिवसलाई सिकोनको वार्षिक कार्यक्रम तालिकामा समावेश गर्न सुझाउ दिए।
सभाको एक महत्त्वपूर्ण हिस्सा सिकोनका उपनियमहरूमा प्रस्तावित संशोधनहरूमा केन्द्रित थियो, जसलाई 28 सेप्टेम्बरमा बसेको 68औँ सञ्चालक समिति बैठकले अनुमोदन गरेको थियो। यी प्रस्तावित संशोधनहरूको उद्देश्य युनियनको संस्थागत संरचनालाई सुदृढ़ पार्नु, सुशासनमा सुधार ल्याउनु र यसका विस्तार हुँदै गएका सञ्चालन तथा विकासमूलक गतिविधिहरूलाई सहयोग पुर्याउनु हो।
सदस्यहरूले कमन सर्भिस सेण्टर (सीएससी) र सिकोन हाट स्थापना, सञ्चालन तथा व्यवस्थापन गर्न सिकोनलाई अधिकार दिने प्रावधान समावेश गर्ने विषयमा पनि चर्चा गरे। यो प्रस्तावित प्रावधानको उद्देश्य डिजिटल तथा नागरिककेन्द्रित सेवाहरूलाई सहजीकरण गर्नु, सहकारी संस्थाहरू तथा सम्बद्ध निकायहरूद्वारा उत्पादित वा आपूर्ति गरिएका वस्तुहरूको प्रवर्द्धन र बजारीकरण गर्नु तथा सहकारी उद्यमहरूका लागि दिगो बजार पहुँच र व्यावसायिक अवसरहरू सिर्जना गर्नु हो। साधारण सभाले यस प्रस्तावमा सहमति जनायो। सभाले अन्य प्रस्ताव पनि पारित गर्यो।
हिन्दुस्थान समाचार / बिशाल
15 Oct 2026
