गान्तोक, 15 अक्टोबर (हि.स.)। शिक्षा विभागअन्तर्गत विद्यार्थी कल्याण बोर्ड र एसकेएम विद्यार्थी प्रकोष्ठको संयुक्त आयोजनामा बिहीवार चिन्तन भवनमा दोस्रो राज्यस्तरीय विद्यार्थी विधानसभा सत्र सम्पन्न भएको छ। ‘सिक्किम@2047: युवाको आवाज’ मूल नाराका साथ आयोजित यस मक सभामा सिक्किमका सबै जिल्लाबाट विश्वविद्यालय तहका विद्यार्थीहरूले सहभागिता जनाए।

कार्यक्रमको तयारीस्वरूप सहभागी विद्यार्थीहरूलाई सिक्किम विधानसभामा विस्तृत प्रशिक्षण प्रदान गरिएको थियो। कार्यक्रममा सिक्किम विधानसभा अध्यक्ष एमएन शेर्पा मुख्य अतिथि, विधानसभा उपाध्यक्ष राजकुमारी थापा विशिष्ट अतिथि तथा गान्तोकका विधायक दिले नामग्याल बर्फुङ्पा विशेष अतिथिका रूपमा उपस्थित रहेका थिए।

मुख्य अतिथिका रूपमा रहेका विधानसभा अध्यक्ष शेर्पाले सहभागी विद्यार्थीहरूको प्रशंसा गर्दै राजनीति र नेतृत्वमा युवाहरूको सहभागिताको महत्त्वमाथि जोड़ दिए। उनले शिक्षाले युवाहरूलाई सामान्य रोजगारीका लागि मात्र नभएर उद्यमशीलता र राजनीतिक भूमिकाका लागि पनि तयार पार्नुपर्ने बताए। उनले युवाहरूलाई यस्ता कार्यक्रमहरूमा सहभागी हुन प्रोत्साहित गर्ने मुख्यमन्त्री पीएस गोलेका पहल र निर्देशनहरूको सराहना गरे।

निर्वाचित प्रतिनिधिहरूको जिम्मेवारीबारे प्रकाश पार्दै उनले नेताहरू जनताबाट टाढ़िनुको सट्टा आफ्नो समुदायसँग नजिकको सम्बन्ध राख्नुपर्ने, जनताको सेवामा सक्रिय रहनुपर्ने र स्थानीय आवश्यकताहरू सम्बोधन गर्नुपर्ने कुरामा जोड़ दिए। अन्त्यमा, विधानसभा अध्यक्षले विधानसभाको कार्यप्रणाली, समितिहरूको जिम्मेवारी र प्रक्रियागत मापदण्डहरूबारे चर्चा गरे। उनले विधायी अभ्यासहरूलाई अन्तरराष्ट्रिय ढाँचाहरूसँग तुलना गर्दै युवाहरूलाई अनुशासन, समर्पण र सक्रिय सहभागिताका लागि प्रोत्साहित गरे।

सोरेङ-च्याखुङ निर्वाचन क्षेत्रका विधायक तथा एसकेएम विद्यार्थी शाखाका उपाध्यक्ष आदित्य गोलेले सिक्किमको भविष्य निर्माण गर्न राज्यका युवा प्रतिभाहरूलाई तयार पार्ने र प्रशिक्षण दिने मुख्यमन्त्रीको दूरदृष्टिको प्रशंसा गरे। “विद्यार्थीहरूको छलफलको सफलता र प्रेरणादायी पक्षलाई उजागर गर्दै उनले बाहिरी स्रोतहरूमा भर पर्नुको सट्टा सिक्किमले आफ्नै युवा पुस्तालाई भविष्यको नेतृत्वदायी भूमिकाका लागि सशक्त बनाइरहेको छ।

प्रतिस्पर्धात्मक भावनालाई अझ बढ़ावा दिन भविष्यमा आयोजना हुने यस्ता विद्यार्थी सभाहरूलाई विस्तार गर्नुपर्छ र अनलाइन पञ्जीकरण प्रक्रिया जस्ता विधिहरू अपनाउनुपर्छ।” उनले कार्यक्रमको सफलताका लागि सम्पूर्ण विद्यार्थी विधायक र आयोजकहरूको प्रशंसा गरे।

मक विधानसभाको सत्रमा सिक्किम भिजन@2047’ का लागि विकास खाका अपनाउने सम्बन्धी सरकारी प्रस्ताव नम्बर 1, 2026’ माथि छलफल गरियो। यो खाका राष्ट्रिय विकसित भारत@2047’ को परिकल्पनासँग मेल खाने गरी राज्यको समावेशी, दिगो र सर्वाङ्गीण विकास हासिल गर्ने उद्देश्यले तयार पारिएको हो। यसमा आर्थिक वृद्धि, सामाजिक विकास, पर्यावरणीय दिगोपन, प्राविधिक उन्नति र संस्थागत रूपान्तरणलाई समेट्ने समन्वयात्मक दृष्टिकोणमा जोड़ दिइएको छ।

यसका लागि शिक्षा तथा अनुसन्धान, पारिवारिक कल्याण, आर्थिक विकास, दिगो कृषि, पूर्वाधार सम्पर्क, पर्यटन, ऊर्जा तथा पर्यावरण, विज्ञान तथा प्रविधि, युवा विकास र सुशासन गरी 10 वटा प्राथमिकताका क्षेत्रहरू निर्धारण गरिएका थिए। लामो र विस्तृत छलफलपछि उक्त प्रस्तावलाई मक सभाको सत्रमा पारित गरियो।

स्वागत सम्बोधनको क्रममा विद्यार्थी कल्याण बोर्डका अध्यक्ष सोनाम छोपेल शेर्पाले यस्तो सभाले युवाहरूलाई आलोचनात्मक सोच राख्न, लोकतान्त्रिक अभ्यासमा संलग्न हुन र शासन प्रणालीप्रति आत्मविश्वास बढ़ाउन एक महत्त्वपूर्ण मञ्चको रूपमा काम गर्ने बताए।

हिन्दुस्थान समाचार / बिशाल