गान्तोक, 16 अक्टोबर (हि.स.)। खुशी, समृद्धि र नयाँ शुरुआतको प्रतीक मानिने दशैँको अवसरमा याङ्गाङ क्षेत्रका 50 परिवारका लागि खुशी मनाउने एउटा विशेष कारण थपिएको छ। यी परिवारहरूका लागि यो चाड़पर्वको समय उत्सव मनाउने अवसर मात्र नभई उनीहरूको जीवनमा एउटा नयाँ अध्यायको शुरुआत बन्नेछ, किनकि उनीहरूले सिक्किम गरीब आवास योजना (एसजीएवाई) अन्तर्गत आफ्ना नयाँ घरका चाबी प्राप्त गर्दैछन्।

याङ्गाङस्थित खण्ड प्रशासन केन्द्र (बीएसी)-ले एसजीएवाई अन्तर्गत निर्माण गरिएका 50 वटा घरको उद्घाटन कार्यक्रम आयोजन गर्दैछ, जसमा लाभार्थीहरूलाई घरका चाबीहरू हस्तान्तरण गरिनेछ। यो पहलले आर्थिक रूपमा कमजोर परिवारहरूलाई सहयोग गर्ने र उनीहरूलाई अझ सुरक्षित, मर्यादित तथा आरामदायक जीवनतर्फ अघि बढ्न मद्दत गर्ने सिक्किम सरकारको निरन्तर प्रतिबद्धतालाई झल्काउँछ।

सिक्किमका मुख्यमन्त्री पीएस गोलेको दूरदर्शी नेतृत्व र क्षेत्र विधायक तथा सिक्किम विधानसभाकी उपाध्यक्ष राजकुमारी थापाको मार्गदर्शनमा अघि बढ़ाइएको यो पहलले जन-केन्द्रित शासनको महत्त्वलाई उजागर गर्दछ। साथै, यसले विकासका लाभहरू जमिनी स्तरसम्मका वास्तविक हकदार परिवारहरूसम्म पुर्‍याउने प्रतिबद्धतालाई पनि पुष्टि गर्दछ।

कुनै पनि परिवारका लागि घर भनेको केवल चार भित्ता र छानो होइन, यो त त्यो ठाउँ हो जहाँ बालक-बालिकाहरू हुर्कन्छन्, परिवारले आफ्ना सुख-दुःख साट्छन् र उज्ज्वल भविष्यका लागि सपनाहरू बुनिन्छन्। घरका चाबीहरू प्राप्त गर्नु भनेको लाभार्थी परिवारहरूको लामो समयदेखिको प्रतीक्षा र आशा पूरा हुनु हो, जसले उनीहरूलाई ‘यो मेरो आफ्नै घर हो’ भन्न सक्ने सन्तुष्टि र सहजता प्रदान गर्दछ।

दशैँको समयमा जब घरहरू प्रार्थना, आशीर्वाद र पारिवारिक मिलनको न्यानोपनले भरिएका हुन्छन्, त्यतिबेला प्राप्त हुने यो बहुमूल्य उपहारले यस अवसरलाई अझ अर्थपूर्ण बनाएको छ। नयाँ घरका चाबीहरूले ढोकाहरू मात्र खोल्ने छैनन्, बरु यसले नयाँ यात्रा शुरु गर्न लागेका परिवारहरूमा नयाँ आशा, आत्मविश्वास र सुरक्षाको भावना पनि भर्नेछन्। यस कार्यक्रममा क्षेत्रीय विधायक तथा उपाध्यक्ष राजकुमारी थापा, राभाङ्लाका एडीसी डीपी दाहाल, क्षेत्र विधायककी ओएसडी डेङ्किला भोटिया, याङ्गाङका एसडीएम केएल दाहाल, याङ्गाङका बीडीओ निदे भोटिया, सीएलसी अध्यक्ष तेङ्ग्यला नाम्खा भोटिया, पञ्चायत सभापति तथा सदस्य, सीएलसी पदाधिकारी, विभिन्न विभागका प्रमुख, बीएसी कर्मचारी र एसजीएवाई योजनाका 50 जना लाभार्थीहरूको उपस्थिति रहनेछ।

यो पहल स्थानीय समुदायको कल्याण र भलाईलाई सुदृढ़ पार्ने दिशामा एक अर्थपूर्ण कदम हो, जसले योग्य परिवारहरूलाई सम्मान र सुरक्षाका साथ बाँच्ने अवसर सुनिश्चित गर्दछ। यसले पूर्वाधार विकासभन्दा पर पुग्ने विकासको त्यो भावनालाई प्रतिविम्बित गर्दछ, जसले आम मानिसहरूको जीवनलाई छुन्छ र उज्ज्वल भोलिको प्रतीक्षामा रहेका परिवारहरूको अनुहारमा खुशी ल्याउँछ।

यस दशैँमा 50 परिवार आफ्नो नयाँ घरमा प्रवेश गर्न तयार भइरहँदा यो अवसरले विकासको वास्तविक अर्थ मानिसहरूको जीवनमा खुशी ल्याउनु, उनीहरूको आशा पूरा गर्नु र अझ राम्रो भविष्यका लागि अवसर सिर्जना गर्नुपर्ने कुरालाई सम्झना गररुँछ।

यस दशैँमा घरको यो उपहारले आश्रय मात्र होइन, बरु आशा, सम्मान, खुशी र उज्ज्वल भोलिको वाचा पनि लिएर आउनेछ।

यसबाहेक, सिक्किम आमा सशक्तिकरण योजना (आमा योजना) अन्तर्गत यसअघि सहयोग प्राप्त गर्न नसकेका 14 जना लाभार्थीलाई पनि आज उनीहरूको लाभ प्रदान गरियो। यस वितरण प्रक्रियाले बाँकी लाभार्थीहरूले आफूले पाउनुपर्ने सहयोग प्राप्त गरेको सुनिश्चित गर्‍यो, जसले दशैँको यस चाड़पर्वको बेलामा उनीहरूका परिवारमा राहत र खुशी ल्याएको छ।

---------------

हिन्दुस्थान समाचार / बिशाल