नयाँ दिल्ली, २३ अक्टोबर (हि.स.)। भारतले शुक्रबार यमनको तटमा भएको एउटा घटनामा संलग्न नौकामा सवार सबै १४ जना भारतीय नागरिक सुरक्षित रहेको र उनीहरू होदेइदाहमा रहेको पुष्टि गरेको छ।

विदेश मन्त्रालयका प्रवक्ता रणधीर जायसवालले शुक्रबार पत्रकार सम्मेलनमा यसबारे जानकारी दिएका हुन्। उनले भने, “हामी सम्बन्धित पक्षहरूको सम्पर्कमा छौँ। हामीलाई प्राप्त जानकारीअनुसार सबै १४ जना भारतीय नागरिक होदेइदाहमा सुरक्षित छन्। विदेशमा रहेका आफ्ना नागरिकहरूको कल्याण र सुरक्षाका लागि हामी प्रतिबद्ध छौँ।”

यमनका हुती विद्रोहीहरूले साउदी अरबको सेनाले बाब अल-मन्देब जलडमरूमध्य नजिकै लाल सागरमा जबल जुकार द्वीपको छेउमा एउटा नौकामाथि आक्रमण गरेको दाबी गरेका थिए। उनीहरूका अनुसार, नौकाका चालक दलका सदस्यहरूलाई उद्धार गरिएको छ। यद्यपि, साउदी अधिकारीहरूले यसबारे तत्काल कुनै टिप्पणी गरेका छैनन्।

हिन्दुस्थान समाचार / बिशाल