-

-वायुसेनाको शौर्यबाट रोमाञ्चित भए प्रधानमन्त्री नरेन्द्र मोदी, लड़ाकू विमानको गर्जनले गुञ्जियो गङ्गा तट

-

-अन्तिम दिन सुखोई, राफेल र मिराजका रोमाञ्चक हवाई कौशल देखेर मानिसहरू गौरवान्वित

-

-गङ्गाका दुवै किनारमा सर्वसाधारणको ठूलो भीड़

वाराणसी, २५ अक्टोबर (हि.स.)। प्रधानमन्त्री नरेन्द्र मोदीले आइतवार आफ्नो संसदीय निर्वाचन क्षेत्र वाराणसीको नमो घाटबाट भारतीय वायुसेनाको शौर्य, कौशल र अदम्य पराक्रमको भव्य दृश्य अवलोकन गरे। भारतीय वायुसेनाको ९४औँ वार्षिकोत्सवका अवसरमा आयोजित ‘विङ्स ओभर गङ्गा’ कार्यक्रमको तेस्रो दिन ‘एयर फोर्स डे एरियल डिस्प्ले–२०२६’ अन्तर्गत १०० वटा विमान तथा हेलिकप्टरले गङ्गामाथि रोमाञ्चक हवाई कौशल प्रदर्शन गरे। लड़ाकू विमानको गर्जन, तीव्र गति र आकर्षक समूहगत उड़ानले प्रधानमन्त्री मोदीसँगै रक्षामन्त्री राजनाथ सिंह, उत्तर प्रदेशकी राज्यपाल आनन्दीबेन पटेल, मुख्यमन्त्री योगी आदित्यनाथ तथा हजारौँ दर्शकलाई रोमाञ्चित बनायो।

गङ्गाको आकाशमा भारतीय वायुसेनाको शक्ति प्रदर्शन हुँदा घाट तथा नदी किनारमा उपस्थित मानिसहरूको उत्साह पनि चरम सीमामा पुगेको थियो। सम्पूर्ण माहोल देशभक्तिको रङमा रङ्गिएको थियो। दर्शकहरूले ‘भारत माता की जय’, ‘हर–हर महादेव’, ‘वन्दे मातरम्’ र ‘मोदी–मोदी’ का नारा लगाइरहेका थिए। प्रधानमन्त्री मोदी तथा अन्य विशिष्ट अतिथिहरूले ताली बजाएर वायुसेनाका साहसी जवानहरूको उत्साह बढ़ाए। यस क्रममा प्रधानमन्त्रीले हात हल्लाएर मानिसहरूको अभिवादन स्वीकार गरे र इशारा मार्फत ‘जय हिन्द’ को सन्देश पनि दिए। पुष्पवृष्टि र ‘नमो–नमो’ का नाराबीच प्रधानमन्त्री मुस्कुराएको देखिए। उनी बीचबीचमा मुख्यमन्त्री योगी आदित्यनाथसँग कुराकानी गरिरहेको पनि देखिन्थ्यो।

हवाई प्रदर्शनमा सुखोई–३० एमकेआई, राफेल, मिराज–२०००, मिग–२९, एलसीए र जगुआर जस्ता अत्याधुनिक लड़ाकू विमानहरूले आफ्नो शक्ति र युद्धक क्षमता प्रदर्शन गरे। हक विमानका साथै सूर्यकिरण र सारङ एरोबेटिक टोलीहरूले पनि उत्कृष्ट हवाई कौशल प्रदर्शन गरेर दर्शकहरूको ध्यान आकर्षित गरे।

विभिन्न दिशाबाट विमानहरूको उड़ान, तीव्र गति, सटीक तालमेल र आकर्षक समूहगत संरचनाले मानिसहरूलाई मन्त्रमुग्ध बनायो। विमानहरूको प्राविधिक विशेषता तथा सामरिक क्षमतामा आधारित टिप्पणीले प्रदर्शनलाई अझ् रोचक बनायो। यसबाट दर्शकहरूले भारतीय वायुसेनाको कार्यप्रणाली, आधुनिक प्रविधि र सञ्चालन क्षमताबारे जानकारी प्राप्त गर्ने अवसर पाए।

हवाई प्रदर्शनमा लड़ाकू विमान बाहेक हेलिकप्टर, परिवहन तथा सहायक विमानहरूले पनि आफ्नो क्षमता प्रदर्शन गरे। हेलिकप्टरको समूहमा एलसीएच, चिनुक, एएलएच मार्क–३, एएलएच मार्क–४, अपाचे, चेतक, कामोभ–३१ र एमआई–१७ भी५ सहभागी थिए। त्यस्तै, परिवहन तथा सहायक विमानतर्फ सी–२९५, सी–१७, सी–१३०, एईडब्ल्यूएण्डसी, आईएल–७८, एएन–३२ र पी–८आईले सहभागिता जनाए।

प्रदर्शनमा भारतीय स्थल सेनाका दुई वटा एएलएच हेलिकप्टरसँगै भारतीय नौसेनाको एउटा पी–८आई विमान र एउटा कामोभ–३१ हेलिकप्टरले पनि सहभागिता जनाए। भारतीय वायुसेनाको गरुड़ विशेष बलको उपस्थितिले कार्यक्रमको सामरिक महत्त्वलाई थप बढ़ायो।

यस भव्य हवाई प्रदर्शनमा कूल १०० वटा विमानले सहभागिता जनाए। तीमध्ये ५२ वटा लड़ाकू विमान, १५ वटा परिवहन विमान, ३२ वटा हेलिकप्टर र एउटा ऐतिहासिक विमान समावेश थिए। यी विमानहरूले देशका १२ वटा विभिन्न वायुसेना अड्डाबाट उड़ान भरे।

गङ्गामाथि आयोजित यस हवाई प्रदर्शनीले भारतीय वायुसेनाको हवाई शक्ति, प्राविधिक दक्षता र व्यापक सञ्चालन क्षमताको झलक प्रस्तुत गर्यो। नमो घाटमा उपस्थित दर्शकहरूले विमानहरूको रोमाञ्चक हवाई कौशललाई ताली र जयघोष सहित स्वागत गरे। प्रधानमन्त्री मोदी पनि वायुसेनाका साहसी जवानहरूको प्रदर्शनबाट उत्साहित देखिए। उल्लेखनीय छ, प्रधानमन्त्री मोदी आइतवार बिहानै वाराणसी पुगेका थिए।

/ बिशाल