गेजिङ, 26 अक्टोबर (हि.स.)। सिक्किम सरकारको महिला, बालबालिका, ज्येष्ठ नागरिक तथा दिव्याङ्गजन कल्याण विभागअन्तर्गत गेजिङ जिल्लाको महिला सशक्तीकरण जिल्ला केन्द्रले ‘बेटी बचाओ, बेटी पढाओ’ अभियानअन्तर्गत अक्टोबर २०२६ महिनाका कार्यक्रमहरू सफलतापूर्वक सम्पन्न गरेको छ।
यस अवधिमा गेजिङ जिल्लाका विभिन्न स्थानमा कुल छवटा कार्यक्रम आयोजना गरिए। कार्यक्रमहरूमा छोरीको जन्मोत्सव मनाउने, मातृ स्वास्थ्य तथा कल्याण प्रवर्द्धन गर्ने र महिनावारी स्वच्छताबारे जनचेतना फैलाउने विषयमा विशेष जोड दिइएको थियो। साथै, जमीनी स्तरमा जनचेतना अभिवृद्धि गर्न परिवार, आँगनवाडी कार्यकर्ता, आँगनवाडी सहयोगी तथा स्थानीय सरोकारवालाहरूको सहभागितालाई प्राथमिकता दिइयो।
कार्यक्रम अन्तर्गत ७ र ८ अक्टोबरमा नाकु चुम्बोङ र लिङ्चोमस्थित एकीकृत बाल विकास सेवा केन्द्रमा छोरी जन्मोत्सव आयोजना गरी लैङ्गिक समानता, बालिकाको अधिकार, शिक्षा र समान अवसरको महत्त्वबारे जनचेतना फैलाइएको थियो।
त्यसैगरी, ९ र १३ अक्टोबरमा लोवर चोङराङ र लोवर गेजिङमा आयोजित गोदभराई कार्यक्रममा गर्भवती आमाको स्वास्थ्य, पोषण, नियमित स्वास्थ्य परीक्षण तथा सुरक्षित मातृत्वको महत्त्वबारे जानकारी दिइएको थियो।
१४ अक्टोबरमा गेजिङस्थित औद्योगिक प्रशिक्षण संस्थानमा महिनावारी स्वच्छतासम्बन्धी कार्यक्रम आयोजना गरी व्यक्तिगत सरसफाइ, प्रयोग गरिएका सामग्रीको सुरक्षित विसर्जन तथा महिनावारीसम्बन्धी सामाजिक भ्रम हटाउने विषयमा सचेतना फैलाइएको थियो।
२६ अक्टोबरमा युक्सममा आयोजित अन्तिम कार्यक्रममा छोरी जन्मोत्सव मनाउनुका साथै नवजात शिशुका आमाहरूलाई शिशु सामग्री बाकस वितरण गरियो। यी कार्यक्रममार्फत विभागले महिला तथा बालिकाको सशक्तीकरण, मातृ तथा शिशु स्वास्थ्य सुधार, लैङ्गिक समानता र सामुदायिक सहभागितालाई प्रोत्साहन गर्ने प्रयास गरेको जनाएको छ। विभागले जिल्लाभर महिला तथा बालिकाको संरक्षण, कल्याण र सशक्तीकरणका लागि यस्ता जनचेतनामूलक कार्यक्रमलाई निरन्तरता दिने प्रतिबद्धता व्यक्त गरेको छ।
---------------
हिन्दुस्थान समाचार / बिशाल
