नयाँ दिल्ली, २७ अक्टोबर (हि.स.)। लोकसभा अध्यक्ष ओम बिरलाले मङ्गलवार ब्रिक्स संसदीय मञ्चको समापन समारोहमा बोल्दै विचार र परिस्थिति फरक हुन सक्ने भए पनि मानवताको कल्याण, शान्ति र समृद्धिप्रतिको प्रतिबद्धता समान रहेको बताएका छन्। यही नै ब्रिक्सको सबैभन्दा ठूलो शक्ति भएको उनले बताए।

नयाँ दिल्लीमा आयोजित १२औँ ब्रिक्स संसदीय मञ्च मङ्गलवार सम्पन्न भएको छ। समापन सत्रलाई सम्बोधन गर्दै लोकसभा अध्यक्षले पछिल्ला दुई दिनमा विभिन्न महत्त्वपूर्ण विषयमा सार्थक छलफल भएको बताए। उनले सम्मेलनमा साझा घोषणापत्रमा सहमति बनेको जानकारी दिए।

घोषणापत्रमा संयुक्त राष्ट्रसङ्घको चार्टर, राष्ट्रहरूको सार्वभौम समानता र विवादको शान्तिपूर्ण समाधानप्रतिको प्रतिबद्धता दोहोर्याइएको छ। साथै, मञ्चले आतङ्कवादका सबै प्रकारका गतिविधिको कड़ा निन्दा गर्दै संयुक्त राष्ट्रसङ्घद्वारा सूचीकृत आतङ्कवादी तथा सङ्गठनहरू विरुद्ध ठोस कारबाही गर्न आह्वान गरेको छ। उनले साल २०२७ मा ब्रिक्सको अध्यक्षता ग्रहण गर्ने चीनलाई शुभकामना समेत दिए।

लोकसभा अध्यक्षले विश्वले अहिले द्वन्द्व, अस्थिरता र आर्थिक अनिश्चितता जस्ता गम्भीर चुनौतीहरूको सामना गरिरहेको बताए। यस्तो अवस्थामा संवाद, विश्वास र सहकार्यको महत्त्व अझ् बढ़ेको उनको भनाइ थियो। भारतले विश्वका समस्याहरूको स्थायी समाधान द्वन्द्वमा नभई संवादमा र युद्धमा नभई शान्तिमा देख्ने गरेको उनले बताए।

उनले भने, “हामीले यस्तो विश्व निर्माणका लागि काम गर्नुपर्छ, जहाँ प्रत्येक राष्ट्रको सार्वभौमसत्ताको सम्मान होस् र विकासका अवसर सबैले समान रूपमा प्राप्त गर्न सकून्।”

उनले लोकतन्त्रमा संसद जनताको आशा र आकाङ्क्षा अभिव्यक्त गर्ने सबैभन्दा महत्त्वपूर्ण केन्द्र भएको बताए। संसद कानून निर्माण गर्ने मञ्च मात्र नभई संवाद, जवाफदेहिता र जनविश्वासको संस्था पनि भएको उनको भनाइ थियो। त्यसैले समयअनुसार संसदहरूलाई अझ् प्रभावकारी, पारदर्शी र जन केन्द्रित बनाउनुपर्ने उनले बताए।

प्रविधिका विषयमा बोल्दै उनले कृत्रिम बुद्धिमत्ता (एआई) र डिजिटल प्रविधिले काम गर्ने तरिकामा परिवर्तन ल्याइरहेको बताए। जिम्मेवार प्रविधिको प्रयोगले संसदीय कामकाजलाई प्रभावकारी बनाउन तथा सांसदहरूको कार्यक्षमता बढ़ाउन सक्ने उनले उल्लेख गरे। तर, एआईको प्रयोग नैतिकता, पारदर्शिता र मानव कल्याणका सिद्धान्तहरूमा आधारित हुनुपर्नेमा उनले जोड दिए।

हिन्दुस्थान समाचार / भवानी थामी