हुब्बल्ली, 0४ अक्टोबर (हि.स.)। अशोक सिंघलले सनातन धर्मको रक्षा, गाई संरक्षण, हिन्दू समाजमा जागरण तथा राष्ट्रिय चेतनाको निर्माणका लागि आफ्नो सम्पूर्ण जीवन समर्पित गरेको केन्द्रियमन्त्री प्रह्लाद जोशीले बताएका छन्।
हुब्बल्लीको देशपाण्डे नगरस्थित सवाई गन्धर्व सभागृहमा विश्व हिन्दू परिषद्, कर्नाटक उत्तर प्रान्तद्वारा आयोजित अशोक सिंघल जन्मशताब्दी समारोहलाई सम्बोधन गर्दै केन्द्रियमन्त्री जोशीले उक्त कुरा बताएका हुन्।
केन्द्रियमन्त्रीले राम जन्मभूमि आन्दोलनका प्रमुख नेतामध्ये एक रहेका अशोक सिंघलको विश्वभर हिन्दू समाजलाई संगठित गर्न महत्त्वपूर्ण योगदान रहेको बताए। अशोक सिंघलको धर्मनिष्ठा, राष्ट्रभक्ति, त्याग, देशसेवाप्रतिको प्रतिबद्धता, विचार तथा सेवाको मार्ग समाजका लागि सदैव प्रेरणादायी र मार्गदर्शक रहने उनले बताए।
समारोह हुकेरीस्थित गुरुशान्तीश्वर संस्थान हिरेमठका पूज्य श्री ष.ब्र. चन्द्रशेखर शिवाचार्य महास्वामीजी तथा कोन्चूरमठका पूज्य श्री सवितानन्द महास्वामीजीको दिव्य सान्निध्यमा आयोजना गरिएको थियो।
कार्यक्रममा राष्ट्रिय स्वयंसेवक सङ्घका प्रान्त सम्पर्क प्रमुख सुधीरसिंह घोरपडे, सेवानिवृत्त पुलिस अधीक्षक शरणप्पा उल्किहाल, विश्व हिन्दू परिषद्का केन्द्रिय सचिव गोपालजी, कर्नाटक उत्तर प्रान्तका अध्यक्ष लिङ्गराज अप्पा, प्रान्त सचिव शिवकुमार बोलशेट्टीलगायत विभिन्न विशिष्ट तथा प्रमुख व्यक्तित्वहरूको उपस्थिति थियो।
हिन्दुस्थान समाचार / भवानी थामी
