- चेक गणराज्यकी आठौँ वरीयताकी खेलाडीले सोझो सेटमा हासिल गरिन् जित, युक्रेनकी मार्ता कोस्त्युक प्रतियोगिताबाट बाहिरिइन्

इन्डियन वेल्स, ११ नोभेम्बर (हि.स.)। विम्बल्डन च्याम्पियन लिण्डा नोस्कोभाले मङ्गलबार उत्कृष्ट प्रदर्शन गर्दै कोको गफलाई सोझो सेटमा पराजित गरेर डब्ल्यूटीए फाइनल्सको सेमिफाइनलमा स्थान बनाएकी छन्। त्यस्तै, जेसिका पेगुलाले युक्रेनकी मार्ता कोस्त्युकलाई पराजित गर्दै अन्तिम चारमा पुग्ने आफ्नो सम्भावना कायम राखेकी छन्।

चेक गणराज्यकी आठौँ वरीयताकी नोस्कोभाले समूह-१ को खेलमा गफलाई ६-३, ६-३ ले पराजित गरिन्। उनले गफको कमजोर सर्भिसको फाइदा उठाउँदै पहिलो सेटमा चार पटक उनको सर्भिस तोडेर ६-३ ले सेट आफ्नो पक्षमा पारिन्।

दोस्रो सेटको सुरुआतमै पनि नोस्कोभाले निर्णायक ब्रेक हासिल गरिन्। त्यसपछि खेलमा आफ्नो नवौँ एस प्रहार गर्दै उनले खेल समाप्त गरिन् र सेमिफाइनलमा आफ्नो स्थान पक्का गरिन्।

जितपछि नोस्कोभाले भनिन्, “म निकै खुशी छु। यस प्रतियोगितामा प्रत्येक जित महत्त्वपूर्ण हुन्छ। कोको एक बलिया प्रतिद्वन्द्वी हुन्, त्यसैले आज मैले हरेक प्रकारको चुनौतीका लागि तयार रहनुपर्ने थियो।”

उनले भनिन्, “कोकोविरुद्ध अन्तिम अङ्कसम्म खेल्नुपर्छ, किनभने उनी आफ्नो सर्भिस र सङ्घर्ष गर्ने क्षमताका आधारमा जुनसुकै बेला खेलमा फर्किन सक्छिन्। मलाई लाग्छ, उनीमाथि दबाउ सिर्जना गर्न मैले उत्कृष्ट खेल प्रदर्शन गरेँ।”

नोस्कोभाले आइतबार आफ्नो पहिलो समूह खेलमा युक्रेनकी कोस्त्युकलाई पनि पराजित गरेकी थिइन्।

पेगुलाले कोस्त्युकलाई हराउँदै सम्भावना कायम राखिन्

अर्कोतर्फ, अमेरिकाकी जेसिका पेगुलाले उतारचढावपूर्ण खेलमा कोस्त्युकलाई ६-२, ७-५ ले पराजित गरिन्। यस हारसँगै कोस्त्युक प्रतियोगिताबाट बाहिरिएकी छन्। अब समूह-१ बाट सेमिफाइनलमा पुग्ने अन्तिम खेलाडीका लागि कोको गफ र पेगुलाबीच प्रतिस्पर्धा हुनेछ।

पेगुलाले आफ्नो पहिलो खेलमा आइतबार गफसँग हार बेहोरेकी थिइन्। तर मङ्गलबार उनले उत्कृष्ट पुनरागमन गर्दै कोस्त्युकलाई पराजित गरिन्।

जितपछि पेगुलाले भनिन्, “मलाई लाग्छ, म राम्रो खेलिरहेकी छु। कोकोविरुद्धको मेरो खेल निकै उच्च स्तरको थियो र आजको खेल पनि उत्कृष्ट रह्यो।”

कोस्त्युकको खेल शैलीलाई चुनौतीपूर्ण बताउँदै उनले भनिन्, “उनका विरुद्ध खेल्न निकै कठिन हुन्छ, किनभने अर्को क्षण के हुने हो भन्ने थाहा हुँदैन। उनी अचानक तीव्र सट खेल्न थाल्छिन्, नेटमा आउँछिन्, रिटर्नमा आक्रामक हुन्छिन् वा उनको सर्भिस उत्कृष्ट हुन थाल्छ। यही कारणले उनीविरुद्ध खेल्न कठिन हुन्छ।”

दोस्रो सेटमा पेगुलाले देखाइन् धैर्य

३२ वर्षीया पेगुलाले पहिलो सेटमा पूर्ण रूपमा आफ्नो दबदबा कायम राखिन्। उनले पहिलो र सातौँ गेममा कोस्त्युकको सर्भिस तोड्दै सेट ६-२ ले जितिन्।

दोस्रो सेटमा भने खेल निकै रोमाञ्चक बन्यो। शुरुआतमा लगातार चार पटक सर्भिस ब्रेक भए। त्यसपछि कोस्त्युकले आफ्नो सर्भिस जोगाउँदै ३-२ को अग्रता बनाइन्।

अर्को गेममा युक्रेनी खेलाडीसँग पेगुलाको सर्भिस तोड्ने अवसर थियो, तर उनले ब्रेक प्वाइन्टको फाइदा उठाउन सकिनन्। पेगुलाले आफ्नो सर्भिस जोगाउँदै स्कोर ३-३ मा पुर्‍याइन्। त्यसपछि अर्को चार गेममा दुवै खेलाडीले आफ्नो सर्भिस कायम राखे।

निर्णायक मोड ११औँ गेममा आयो, जब पेगुलाले कोस्त्युकको सर्भिस तोडिन्। चौथो ब्रेक प्वाइन्टमा सफलता हासिल गर्दै उनले ६-५ को अग्रता बनाइन् र त्यसपछि आफ्नो सर्भिस जोगाएर खेल जितिन्। कोस्त्युकको फोरह्यान्ड सट कोर्टबाहिर गएसँगै पेगुलाको जित निश्चित भयो।

हिन्दुस्थान समाचार / बिशाल