- इरानसँग जारी युद्धलाई लिएर रिपब्लिकन सांसद थोमस मेसीले ल्याएका थिए महाभियोग प्रस्ताव

वासिङ्टन (अमेरिका), ११ नोभेम्बर (हि.स.)। अमेरिकी संसद्को तल्लो सदन प्रतिनिधि सभा (हाउस अफ रिप्रेजेन्टेटिभ्स) मा मंगलबार रिपब्लिकन सांसद थोमस मेसीले रक्षामन्त्री (परिवर्तित पदनाम युद्ध सचिव) पीट हेगसेथविरुद्ध प्रस्तुत गरेको महाभियोग प्रस्ताव खारेज भएको छ। मुख्य रूपमा इरानसँग जारी युद्धलाई लिएर ल्याइएको उक्त प्रस्तावलाई न्यायपालिका समितिमा पठाउने पक्षमा २११ र विपक्षमा २०४ मत परेको थियो। यससँगै प्रस्तावले आफ्नो प्रभाव गुमाएको छ।

सीबीएस न्युजको समाचारअनुसार, सबै डेमोक्रेट सांसदसँगै प्रस्तावको पक्षमा मतदान गर्ने मेसी एक्ला रिपब्लिकन सांसद थिए। मतदानपछि मेसीले भने, “मलाई आश्चर्य लागेको छैन, तर निराश भने अवश्य भएको छु। संसद्का सदस्यहरूलाई के गर्नुपर्छ भन्ने थाहा छ। तर त्यसो गर्दा राजनीतिक लाभ नै हुने भए पनि उनीहरू त्यसो गर्ने साहस जुटाउन सक्दैनन् भन्ने मेरो निष्कर्ष हो।”

केन्टकीका रिपब्लिकन सांसद मेसीले सोमबार हेगसेथविरुद्ध अब अर्को महाभियोग प्रस्ताव नल्याउने बताएका थिए। यस वर्षको प्रारम्भमा भएको पार्टीको प्राथमिक निर्वाचनमा पराजित भएपछि उनी आगामी जनवरीको सुरुवातमा अवकाश लिँदैछन्।

यद्यपि, डेमोक्रेटहरूले यो मुद्दालाई अगाडि बढाउन सक्ने सम्भावना रहेको छ। विशेषगरी जनवरीमा प्रतिनिधि सभा र सिनेट दुवै सदनमा पुनः आफ्नो नियन्त्रण कायम भएमा उनीहरूले यस विषयलाई अघि बढाउन सक्छन्। प्रतिनिधि सभामा अल्पमतका नेता तथा न्युयोर्कका डेमोक्रेट सांसद हाकिम जेफ्रिजले भने, “यो अन्त्य होइन, यो त केवल शुरुवात हो।”

मेसीले अब ‘युद्ध शक्तिसम्बन्धी’ प्रस्तावमा मतदान गराउने योजना रहेको बताएका छन्। उनले भने, “युद्धका कारण निर्वाचन हारेको भन्दै आएका सबै रिपब्लिकन सांसदले अब पनि यसको पक्षमा मतदान गर्छन् कि गर्दैनन्, हामी हेर्नेछौँ।”

महाभियोग प्रस्तावमा हेगसेथमाथि विभिन्न आरोप लगाइएको थियो। तीमध्ये कांग्रेसको स्वीकृतिबिना इरानसँग युद्ध शुरु गरेर पदको दुरुपयोग गरेको, सर्वसाधारणको क्षति न्यूनीकरण गर्न बनाइएका कानुनको बेवास्ता गरेको, क्यारिबियन क्षेत्रमा पेन्टागनका जलयानमाथिका आक्रमणका क्रममा न्यायिक प्रक्रियाबिना हत्या गर्न निर्देशन दिएको, भेनेजुएलाका राष्ट्रपति निकोलस मादुरोको अपहरणको आदेश दिएको तथा डेमोक्रेटिक सिनेटर मार्क केलीविरुद्ध प्रतिशोधपूर्ण कारबाही गरेको आरोप समावेश थिए।

हेगसेथले मंगलबार बिहान आयोजित पत्रकार सम्मेलनमा महाभियोगको प्रयासको निन्दा गर्दै यसलाई ‘तमासा’ र ‘राजनीतिक देखावटी’ बताएका थिए। उनले भने, “यीमध्ये कुनै पनि गम्भीर अपराध वा दुराचार होइनन्। यी त केवल पक्षपातपूर्ण नीतिगत असहमति हुन्, जुन हाम्रो सेनालाई राजनीतीकरण गर्न चाहनेहरूबाट आएका छन्।”

राष्ट्रपति डोनाल्ड ट्रम्पले पनि महाभियोगको प्रयासको उपहास गर्दै यो ‘नराम्रोसँग असफल भएको’ टिप्पणी गरेका थिए।

अमेरिकी इतिहासमा अहिलेसम्म मन्त्रिपरिषद्का केवल दुई सचिवविरुद्ध महाभियोग प्रक्रिया अघि बढाइएको छ। १८७६ मा भ्रष्टाचारको आरोपमा तत्कालीन युद्धमन्त्री विलियम बेल्कन्यापविरुद्ध महाभियोग लगाइएको थियो। त्यस्तै, सन् २०२४ मा दक्षिणी सीमा व्यवस्थापनको विषयलाई लिएर गृह सुरक्षा सचिव एलेजान्द्रो मायोर्कासविरुद्ध महाभियोग प्रक्रिया अघि बढाइएको थियो। सिनेटले बेल्कन्यापलाई आरोपबाट मुक्त गरेको थियो भने मायोर्कासविरुद्धको प्रस्ताव खारेज गरेको थियो।

हिन्दुस्थान समाचार / बिशाल