
गान्तोक, १८ नोभेम्बर (हि.स.)। गान्तोकस्थित पाल्जोर स्टेडियम परिसरको इन्डोर ब्याडमिन्टन हलमा जारी योनेक्स-सनराइज ४९औँ अन्तरराज्य तथा अन्तरक्षेत्रीय जुनियर राष्ट्रिय ब्याडमिन्टन प्रतियोगिता २०२६ को पाँचौँ दिन देशभरिका युवा खेलाडीहरूले उत्कृष्ट खेल प्रदर्शन गर्दै रोमाञ्चक प्रतिस्पर्धा प्रस्तुत गरे। दिनभरि भएका खेलहरूमा उत्कृष्ट खेलकौशल र कडा प्रतिस्पर्धा देखिएको थियो।
प्रतियोगिताका विभिन्न सत्रमा सिक्किम उच्च न्यायालयका मुख्य न्यायाधीश न्यायमूर्ति ए. मुहम्मद मुस्ताक, ग्रामीण विकास तथा सहकारिता विभागका मन्त्री अरुणकुमार उप्रेती, लोकसभा सांसद डा. इन्द्रहाङ सुब्बा, ग्रामीण विकास विभागका सचिव अनिलराज राई तथा मुख्यमन्त्रीका पाकिम जिल्ला अतिरिक्त राजनीतिक सचिव विशाल शर्मासहित राज्य सरकारका वरिष्ठ अधिकारीहरूको उपस्थिति रहेको थियो।
अन्डर-१९ युगलतर्फ पाँचौँ दिनको खेलमा उत्तराखण्डका वेदान्श नेगी र अलिशा भण्डारीको जोडीले आफ्नै राज्यका भानु प्रताप सिंह चौहान र काव्या राजको जोडीलाई १५-६, १०-१५, १५-१३ ले पराजित गर्यो। मिजोरमका मालसावम्ह्लुआ र जोरामथारी रेन्थलेले पञ्जाबका कृतज्ञ अरोरा र समाइरा अरोरालाई १५-१२, ७-१५, १५-१२ ले हराए। त्यसैगरी, कर्नाटकका पुनिथा र दीपक राज अदितिले हरियाणाका वेदान्त पाहवा र जोएल रानालाई १५-९, १३-१५, १५-१२ ले पराजित गरे।
तेलङ्गानाका शौर्य किरण र कीर्ति मन्चालाले हरियाणाका चैतन्य सेहावत र अनन्यालाई १६-१४, १५-१२ ले पराजित गर्दै सोझो सेटमा जित हासिल गरे। राजस्थानका यश सोनी र मोक्षिता भारद्वाजले पुडुचेरीका हरिशराज गवेन्दिरन वैथियानाथन र जननिका रमेशलाई १५-१३, १५-१२ ले हराए।
दिव्यांश अग्रवाल र वर्णा प्रभुआनन्दले दोस्रो सेट गुमाए पनि उत्कृष्ट पुनरागमन गर्दै यदुनन्दन के. र अक्षरा सिस्तालाई १५-१३, १४-१६, १५-७ ले पराजित गरे। मोहम्मद नफीज रफ्फी र दक्षता वीबीले पनि जङ्जीत सिंह काजला र एन्जल पुनेराविरुद्ध तीन सेटसम्म चलेको प्रतिस्पर्धामा जित निकाले।
अन्डर-१९ एकलतर्फ पनि उत्कृष्ट रणनीतिक र पुनरागमनका रोमाञ्चक खेल देखिए। यूटीआरका निश्छल चन्दले ओडिशाका सुभ्रकेतान मल्लिक निशान्तलाई १५-४, १५-९ ले पराजित गरे। महाराष्ट्रका तनय अजय मेहेन्दलेले सिक्किमका पोर्वश प्रसादलाई १५-८, १५-१३ ले हराए।
पञ्जाबका विराज शर्माले हरियाणाका स्पर्श सूदविरुद्ध पहिलो सेट गुमाए पनि त्यसपछि उत्कृष्ट पुनरागमन गर्दै १०-१५, १५-१०, १५-१२ ले जित हासिल गरे। तेलङ्गानाका टङ्करा ज्ञान दत्तु तलासिला, छत्तीसगढका रुद्र प्रताप सिंह राणा, कर्नाटकका अभिनव गर्ग र केरलाका किरण नोगुचीले आ-आफ्नो खेलमा सोझो सेटमा विजय हासिल गरे।
अन्य उल्लेखनीय एकल प्रतिस्पर्धामा मध्यप्रदेशका प्रनित सोमानीले हिमाचल प्रदेशका देवांश राणालाई तीन सेटको खेलमा १५-६, ७-१५, १५-१२ ले पराजित गरे। दिनकै सबैभन्दा रोमाञ्चक प्रतिस्पर्धामध्ये एकमा पश्चिम बङ्गालका दिव्यांश अग्रवालले तमिलनाडुका मोहित धरसन महेशकुमारलाई निर्णायक सेटमा १६-१४ ले हराए।
विशिष्ट अतिथिहरूको उपस्थितिले प्रतियोगिताको गरिमा बढाउनुका साथै युवा खेलाडीहरूलाई थप उत्साह प्रदान गरेको आयोजकले जनाएको छ। प्रतियोगिताले उदाउँदा ब्याडमिन्टन खेलाडीहरूलाई आफ्नो क्षमता परीक्षण गर्ने, राष्ट्रियस्तरको प्रतिस्पर्धात्मक अनुभव हासिल गर्ने तथा उत्कृष्ट जुनियर खेलाडीहरूसँग प्रतिस्पर्धा गर्दै खेलस्तर सुधार गर्ने अवसर प्रदान गरिरहेको छ।
कार्यक्रमको अन्त्यमा ब्याडमिन्टन एसोसिएसन अफ सिक्किमका महासचिव सुकान्त दासले धन्यवाद ज्ञापन गर्दै विशिष्ट अतिथि, अधिकारी, सहभागी टोली, प्रशिक्षक, आयोजक तथा प्रतियोगिताको सफल सञ्चालनमा सहयोग पुर्याउने सबैप्रति आभार व्यक्त गरे।
प्रतियोगिताको छैटौँ दिनका खेलहरू भोलि १९ नोभेम्बरमा विभिन्न विधाअन्तर्गत पुनः सञ्चालन हुनेछन्।
हिन्दुस्थान समाचार / बिशाल