रेल परियोजनालाई तीव्रता दिन पूर्वोत्तर सीमान्त रेलवे (निर्माण) ले सिक्किम सरकारसँग समन्वय बढायो
सिक्किमका मुख्यमन्त्री प्रेमसिंह तामाङ र सांसद डा. इन्द्रहाङ सुब्बासँग भेट गर्दै एनएफआर (निर्माण) का महाप्रबन्धक आशिष बंसल।


गुवाहाटी, १८ नोभेम्बर (हि.स.)। पूर्वोत्तर सीमान्त रेलवे (निर्माण) का महाप्रबन्धक आशीष बंसलले गान्तोकमा सिक्किमका मुख्यमन्त्री प्रेमसिंह तामाङ, सिक्किमका लोकसभा सांसद डा. इन्द्रहाङ सुब्बा तथा राज्य सरकारका मुख्य सचिवसँग भेटवार्ता गरेका छन्। भेटका क्रममा राज्यमा सञ्चालन भइरहेका महत्त्वपूर्ण रेल पूर्वाधार परियोजनाहरूको प्रगतिबारे छलफल गरिएको छ।

पूर्वोत्तर सीमान्त रेलवेका मुख्य जनसम्पर्क अधिकारी कपिञ्जल किशोर शर्माले आज जानकारी दिँदै गत मङ्गलबार मुख्यमन्त्रीसँग भएको भेटमा बंसलले सेवक-रम्फू नयाँ रेलमार्ग परियोजनाको पछिल्लो प्रगतिबारे अवगत गराएको बताए। उनले निर्माणाधीन कार्यहरू तथा परियोजनालाई तीव्र गतिमा अघि बढाउन भइरहेका प्रयासबारे जानकारी गराएका थिए। यसका साथै रम्फू-सरम्सा तथा मल्ली-देन्ताम सर्वेक्षण कार्यको पछिल्लो अवस्थाबारे पनि मुख्यमन्त्रीलाई अवगत गराइएको थियो।

४४.९६ किलोमिटर लामो सेवक-रम्फू नयाँ रेलमार्ग परियोजना रणनीतिक दृष्टिले महत्त्वपूर्ण पूर्वाधार परियोजना हो। यस परियोजनाको उद्देश्य सिक्किमलाई पहिलोपटक रेलमार्गसँग जोड्नु हो। हिमाली भूभागमा चुनौतीपूर्ण निर्माण कार्य भइरहेको यस परियोजनाअन्तर्गत १४ वटा सुरुङ, १३ वटा ठूला पुल र १० वटा साना पुल निर्माण गरिँदैछ। परियोजना सम्पन्न भएपछि सिक्किमको यातायात सम्पर्कमा उल्लेखनीय सुधार आउने, यात्रु तथा मालसामान ओसारपसार सहज हुने, पर्यटन प्रवर्द्धन हुने र समग्र सामाजिक-आर्थिक विकासमा योगदान पुग्ने अपेक्षा गरिएको छ। परियोजना जून २०२८ सम्ममा सम्पन्न गर्ने लक्ष्य राखिएको छ।

महाप्रबन्धक बंसलले सिक्किमका लोकसभा सांसद डा. इन्द्रहाङ सुब्बासँग पनि भेट गरी सेवक-रम्फू नयाँ रेलमार्ग परियोजना तथा मल्ली-देन्ताम सर्वेक्षण कार्यको पछिल्लो प्रगतिबारे जानकारी गराए। भेटका क्रममा सिक्किममा रेल सम्पर्क विस्तार गर्नुको महत्त्व तथा यसबाट पर्यटन, क्षेत्रीय विकास र सामाजिक-आर्थिक प्रगतिमा पुग्न सक्ने योगदानबारे पनि छलफल भएको थियो।

सिक्किम सरकारका मुख्य सचिवसँग भएको बैठकमा सेवक-रम्फू नयाँ रेलमार्ग परियोजनाका लागि राज्य सरकारको हस्तक्षेप आवश्यक पर्ने विषयहरूको समाधान तथा परियोजनालाई तीव्रता दिन समन्वय संयन्त्र स्थापना गर्ने विभिन्न पक्षमा छलफल केन्द्रित रहेको थियो।

यी भेटवार्ताले सिक्किममा रेल पूर्वाधार परियोजनाहरूलाई निर्धारित समयभित्र अघि बढाउन राज्य सरकार तथा अन्य सरोकारवालासँग समन्वय सुदृढ गर्ने पूर्वोत्तर सीमान्त रेलवे (निर्माण) को निरन्तर प्रयासलाई प्रतिबिम्बित गरेको छ। सेवक-रम्फू नयाँ रेलमार्ग परियोजना सिक्किम तथा समग्र पूर्वोत्तर क्षेत्रमा यातायात सम्पर्क विस्तार गर्ने दिशामा महत्त्वपूर्ण कदम मानिएको छ।

हिन्दुस्थान समाचार / बिशाल


 rajesh pande