उज्जैन, 0६ नोभेम्बर (हि.स.)। मध्य प्रदेशको उज्जैनस्थित विश्वप्रसिद्ध ज्योतिर्लिङ्ग श्री महाकालेश्वर मन्दिरमा आजदेखि दीपोत्सव शुरु हुँदैछ। धनतेरसको अवसरमा मन्दिरको नन्दी हलमा परम्पराअनुसार विशेष महापूजा आयोजना गरिनेछ। बिहान ९ बजीदेखि पूजा शुरु भएको छ। एक घण्टासम्म गणपति, महालक्ष्मी र भगवान् महाकालको पूजाअर्चना तथा अभिषेक गरिनेछ। यस क्रममा भगवान् महाकाललाई चाँदीको सिक्का अर्पण गर्नुका साथै धनकुबेर र चाँदीका सिक्काहरूको पनि पूजा गरिनेछ।

पुरोहित समितिका पुजारीहरूले आरोग्य, सुख-समृद्धि, जनकल्याण तथा विश्वकल्याणको कामना गर्दै महापूजा गर्नेछन्। पूजाको शुरुवात गणपति पूजा र महालक्ष्मी पूजाबाट हुनेछ। त्यसपछि भगवान् महाकालको पञ्चामृत पूजा तथा रुद्राभिषेक गरिनेछ। कार्यक्रममा जिल्ला अधिकारी रोशन कुमार सिंह, पुलिस अधीक्षक प्रदीप शर्मा, मन्दिर प्रशासक प्रथम कौशिकसहित पुजारी तथा पुरोहितहरू सहभागी हुनेछन्।

पुरोहित समितिका अध्यक्ष लोकेश व्यासका अनुसार, धनतेरसमा गरिने यो पूजा मन्दिरको परम्पराको एक हिस्सा हो। यस अवसरमा सबैको सुख, समृद्धि र आरोग्यका साथै विश्वकल्याणको कामना गरिनेछ। महापूजासँगै महाकाल मन्दिरमा दीपोत्सवका धार्मिक कार्यक्रमहरू पनि शुरु हुनेछन्।

चाँदीको चन्द्र-त्रिशूल र मुकुटले सजिए बाबा महाकाल

धनतेरसको अवसरमा आज बिहान ४ बजी भगवान् महाकालको भस्म आरती सम्पन्न भयो। मन्दिरको ढोका खुलेपछि सभामण्डपमा वीरभद्रजीको कानमा स्वस्तिवाचन गरिएको थियो। घण्टी बजाएर भगवानको आज्ञा लिइयो र चाँदीका ढोकाहरू खोलिए। त्यसपछि पुजारीहरूले गर्भगृहमा भगवान्को शृङ्गार हटाएर पूजाअर्चना तथा अभिषेकको परम्परा पूरा गरे।

भगवानलाई हरिओम जल अर्पण गरेपछि दूध, दही, घिउ, चिनी, मह र फलफूलको रसबाट तयार गरिएको पञ्चामृतले अभिषेक गरियो।

पञ्चामृत पूजापछि कपूर आरती गरिएको थियो। मन्त्र उच्चारणका बीच भगवान् महाकाललाई भस्म अर्पण गरियो। त्यसपछि ज्योतिर्लिङ्गलाई चाँदीको चन्द्र-त्रिशूल, शेषनागको चाँदीको मुकुट, चाँदीको मुण्डमाला तथा रुद्राक्षको मालाले सजाइएको थियो। भगवान्लाई भाङ, चन्दन र सुक्खा फलफूल अर्पण गरियो। सुगन्धित फूलका मालाले शृङ्गार गरी फलफूल तथा मिठाईको भोग लगाइएको थियो।

भस्म अर्पणपछि निराकारबाट साकार स्वरूपमा दर्शन

भस्म आरतीमा ठूलो सङ्ख्यामा श्रद्धालुहरू सहभागी भएका थिए। महा निर्वाणी अखाडाका तर्फबाट भगवान् महाकाललाई भस्म अर्पण गरिएको थियो। धार्मिक मान्यताअनुसार, भस्म अर्पणपछि भगवान् महाकाल निराकारबाट साकार स्वरूपमा भक्तहरूलाई दर्शन दिनुहुन्छ।

आरतीका क्रममा मन्दिर परिसर बाबा महाकालको जयजयकारले गुञ्जायमान बनेको थियो। श्रद्धालुहरूले नन्दी महाराजको दर्शन गर्दै उहाँको कानमा आफ्ना मनोकामना व्यक्त गरे र बाबा महाकालसँग सुख-समृद्धिको कामना गरे।

हिन्दुस्थान समाचार / भवानी थामी