भारत–पाकिस्तान युद्धको पृष्ठभूमिमा आधारित सनी देओल र वरुण धवन अभिनीत फिल्म ‘बोर्डर–२’ ले बक्स अफिसमा लगातार आफ्नो प्रभाव देखाइरहेको छ। २३ जनवरीमा रिलिज भएको यो मल्टिस्टारर फिल्मले १० दिन बितिसक्दा पनि आफ्नो रफ्तार कायम राखेको छ। सप्ताहन्तमा फिल्मको कमाइमा उल्लेखनीय वृद्धि देखिएको छ र यसले थुप्रै नयाँ कीर्तिमानहरू आफ्नो नाममा गरेको छ।
पहिलो हप्तामै मजबुत पकड बनाएको फिल्मले दोस्रो सप्ताहन्तमा फेरि सशक्त प्रदर्शन गरेको छ। रिपोर्टअनुसार, १०औँ दिन अर्थात् दोस्रो आइतबार फिल्मले २४.२२ करोड़ रुपियाँ कमाएको छ भने शनिबार (९औँ दिन) को कलेक्सन २०.१७ करोड़ रुपियाँ रहेको छ। यससँगै घरेलु बक्स अफिसमा फिल्मको कुल नेट कलेक्सन ३०१.८९ करोड़ रुपियाँ पुगेको छ।
भारतमा मात्र होइन, विदेशमा पनि ‘बोर्डर–२’ ले उत्कृष्ट प्रतिक्रिया पाइरहेको छ। सुरुवाती कार्यदिनहरूमा सामान्य गिरावट आएपछि सप्ताहन्तमा फिल्मले पुनः तीव्र गति लिएको छ। विश्वव्यापी रूपमा फिल्मले १० दिनमै करिब ३७७ करोड़ रुपियाँ कमाइसकेको छ।
यस कमाइसँगै ‘बोर्डर–२’ ले धेरै चर्चित फिल्महरूको लाइफटाइम कलेक्सनलाई पछि पारेको छ। तीमध्ये ‘आदिपुरुष’ (करिब ३५५ करोड़), ‘फाइटर’ (करिब ३५४ करोड़) र ‘उरी: द सर्जिकल स्ट्राइक’ (करिब ३४३ करोड़) प्रमुख छन्।
यी आँकडाले स्पष्ट पारेको छ कि ‘बोर्डर–२’ केवल एक सफल सिक्वेल मात्र नभई वर्तमान समयको सबैभन्दा ठूला बक्स अफिस हिट फिल्महरूमध्ये आफ्नो स्थान बनाउन सफल भएको छ। यदि यही रफ्तार कायम रह्यो भने आगामी दिनहरूमा फिल्मले अझ धेरै ठूला कीर्तिमानहरू आफ्नो नाममा राख्न सक्छ।
---------------
हिन्दुस्थान समाचार / बिशाल
