कोलकाता, १४ मार्च (हि.स.)। कोलकाताको ब्रिगेड परेड मैदानमा आयोजित भारतीय जनता पार्टी (भाजपा) को परिवर्तन संकल्प र्यालीमा प्रधानमन्त्री नरेन्द्र मोदी आउनुअघि पार्टीका धेरै वरिष्ठ नेताहरूले पश्चिम बंगालकी मुख्यमन्त्री ममता ब्यानर्जीको सरकारमाथि तीखो राजनीतिक प्रहार गरे र राज्यमा सत्ता परिवर्तनको दाबी गरे। र्यालीलाई सम्बोधन गर्दै अभिनेता तथा भाजपा नेता मिथुन चक्रवर्तीले राज्य सरकारको युवा साथी योजना मा प्रश्न उठाउँदै भने, भाजपा सत्तामा आएपछि राज्यका बासिन्दाहरूको समस्या समाधान गर्नेछ। उनले किसानहरू, विशेषगरी आलू उत्पादकहरूलाई प्राथमिकता दिएर काम गर्ने आश्वासन दिए। मुख्यमन्त्री ममता ब्यानर्जीमाथि व्यंग्य गर्दै उनले आरोप लगाए, राज्य सरकारले जनतासँग गरेका वाचाहरू पूरा गरेको छैन।

भाजपाका प्रदेश अध्यक्ष सुकान्त मजुमदारले पनि तृणमूल कांग्रेसको नीतिहरूको आलोचना गरे। उनले भने, केन्द्र सरकारको किसान सम्मान निधि योजनाबाट किसानहरूलाई आर्थिक लाभ भएको छ। साथै आलू किसानहरूको समस्या उल्लेख गर्दै उनले भाजपाको सरकार बनेपछि किसानहरूलाई समर्थन मूल्य सुनिश्चित गर्ने बताए।

पार्टीका पूर्व प्रदेश अध्यक्ष दिलीप घोषले आफ्नो सम्बोधनमा राज्यका जनतालाई वर्तमान सरकार हटाउने अपील गरे। उनले भने, भाजपा पश्चिम बंगालमा विकास र रोजगारीका नयाँ अवसरहरू सिर्जना गर्छ। उनले दाबी गरे, प्रधानमन्त्री नरेन्द्र मोदीको नेतृत्वमा राज्यमा रेल र अवसंरचना सम्बन्धी धेरै विकास कार्य भएका छन्। उनले आरोप लगाए, राज्य सरकारको नीतिका कारण धेरै उद्योगपतिहरू लगानी गर्न टारिरहेका छन्।

भाजपा नेता तथा सांसद लोकेट चटर्जीले भने, परिवर्तन यात्रामा पार्टीले व्यापक जनसमर्थन पाएको छ र राज्यमा परिवर्तन निश्चित छ। अर्कोतर्फ भाजपाका वरिष्ठ नेता राहुल सिन्हा र तापस रायले पनि आफ्ना भाषणहरूमा तृणमूल सरकारमाथि भ्रष्टाचार र तुष्टीकरणको राजनीति गर्ने आरोप लगाए।

पूर्व केन्द्रियमन्त्री निशीथ प्रमाणिकले उत्तर बंगालको विकासको मुद्दा उठाउँदै राज्य सरकारमाथि क्षेत्रको उपेक्षा गरेको आरोप लगाए। उनले भने, उत्तर बंगालका जनतासँग गरिएका धेरै वाचाहरू अझसम्म पूरा भएका छैनन्।

र्यालीमा भाजपाका वरिष्ठ नेता शुभेन्दु अधिकारी, सुकान्त मजुमदार, शमिक भट्टाचार्य, राहुल सिन्हा, दिलीप घोष, मिथुन चक्रवर्ती, अभिजीत गंगोपाध्याय र तथागत राय लगायत धेरै प्रमुख नेता उपस्थित थिए। यसबीच प्रधानमन्त्री नरेन्द्र मोदीको आगमनअघि नै ब्रिगेड मैदानमा ठूलो संख्यामा कार्यकर्ता र समर्थकहरू पुगेका थिए। सुरक्षा व्यवस्थाका लागि व्यापक प्रबन्ध गरिएको थियो र कोलकाता पुलिसका कर्मचारीहरूका लागि विशेष व्यवस्था गरिएको थियो।

राजनीतिक विश्लेषकहरूका अनुसार, भाजपाको यो र्याली आगामी विधानसभा चुनाउअघि पार्टीको शक्ति प्रदर्शनको रूपमा हेरिएको छ, जसमार्फत राज्यमा संगठनात्मक शक्ति र जनसमर्थन देखाउने प्रयास गरिएको छ।

---------------

हिन्दुस्थान समाचार / भवानी थामी