श्रीनगर, १६ मार्च (हि.स.)। कश्मीरमा वसन्त ऋतुको आगमनसँगै एशियाकै सबैभन्दा ठूलो ट्युलिप गार्डेन सोमबारदेखि सर्वसाधारणका लागि खोलिएको छ। यस बहुप्रतीक्षित पुष्प उद्यान अवलोकन गर्न हजारौँ पर्यटक तथा स्थानीय बासिन्दा आउने अपेक्षा गरिएको छ।

श्रीनगरस्थित इन्दिरा गान्धी स्मारक ट्युलिफ गार्डनको उद्घाटन जम्मू-कश्मीरका मुख्यमन्त्री ओमर अब्दुल्लाले गरेका हुन्। जबरवान पर्वतको फेदीमा रहेको यो बगैंचा खोल्नु घाटीमा वसन्त ऋतुको आगमनको प्रतीक मानिन्छ र कश्मीरको पर्यटन सिजन शुरु भएको संकेत पनि हो।

प्रसिद्ध डल लेकलाई अवलोकन गर्न सकिने ढलानमा फैलिएको यस उद्यानमा विभिन्न रङ र प्रजातिका लाखौँ ट्युलिप फूलहरू फुल्नेछन्, जसले आगन्तुकहरूलाई मनमोहक दृश्य प्रदान गर्नेछ।

अधिकारीहरूका अनुसार, यस वर्ष उद्यानमा ट्युलिपका ७० भन्दा बढी प्रजाति रोपिएका छन्। ट्युलिपसँगै हायसिन्थ, डैफोडिल, मस्कारी र रैननकुलसजस्ता अन्य वसन्त ऋतुका फूलहरू पनि लगाइएको छ, जसले बगैंचाको सुन्दरता अझ बढाउनेछ।

हरेक वर्ष फूल फुल्ने मौसममा यो बगैंचा देश-विदेशका हजारौँ पर्यटक, प्रकृति प्रेमी र फोटोग्राफरहरूलाई आकर्षित गर्छ। त्यसैले वसन्त ऋतुमा यो कश्मीरका सबैभन्दा बढी भ्रमण गरिने पर्यटकीय स्थलमध्ये एक बनेको छ।

अधिकारीहरूले फूल फुल्ने मौसममा सम्भावित भीडलाई व्यवस्थित गर्न यातायात सुविधा, पार्किङ व्यवस्था, सुरक्षा तैनाती तथा अन्य आवश्यक पर्यटक सुविधाहरूको व्यापक तयारी गरिएको जानकारी दिएका छन्।

---------------

हिन्दुस्थान समाचार / भवानी थामी