मुख्यमन्त्रीले न्यायिक छानबिनको निर्देशन दिए

भुवनेश्वर, १६ मार्च (हि.स.)। ओडिशाको कटकस्थित एससीबी मेडिकल कलेज एण्ड हस्पिटलको इमरजेन्सी विभागअन्तर्गत ट्रमा केयर आईसीयूमा सोमबार बिहान भीषण आगलागी हुँदा कम्तीमा १० जना बिरामीको मृत्यु भएको छ। अन्य धेरै बिरामी गम्भीर रूपमा जलेका छन्।

प्रारम्भिक जानकारी अनुसार, आगलागी बिहान करिब २:३० बजी अस्पतालको पहिलो तल्लामा लागेको थियो। विद्युत् सर्ट सर्किटका कारण आगलागी भएको हुनसक्ने आशंका गरिएको छ, तर वास्तविक कारण भने छानबिनपछि मात्रै स्पष्ट हुने बताइएको छ।

घटनाको जानकारी पाएपछि ओडिशाका मुख्यमन्त्री मोहन चरण माझी घटनास्थलमा पुगेर अवस्थाको निरीक्षण गरेका छन्। उनले यस दुर्घटनाको न्यायिक छानबिन गर्न निर्देशन दिएका छन्, जसबाट आगलागीको कारण पत्ता लगाउन र भविष्यमा यस्ता घटनाहरू रोक्न सकियोस्।

मुख्यमन्त्रीले आगलागीमा ज्यान गुमाउने व्यक्तिहरूका परिवारप्रति गहिरो समवेदना व्यक्त गरेका छन्। साथै उनले अधिकारीहरूलाई अन्य बिरामीहरूलाई तुरुन्त सुरक्षित स्थानमा सारेर उपचार निरन्तर राख्न निर्देशन दिएका छन्।

यस घटनामा मृत्यु भएका व्यक्तिहरूका नजिकका परिवारजनलाई मुख्यमन्त्री राहत कोषबाट जनही २५-२५ लाख रुपियाँ अनुग्रह सहायता प्रदान गर्ने घोषणा पनि गरिएको छ।

मुख्यमन्त्री माझीले अस्पतालमा उपचाररत बिरामीहरू र उनीहरूका परिवारसँग भेटेर सान्तवना दिएका छन्। साथै उनले स्वास्थ्य विभाग र अस्पताल प्रशासनलाई आईसीयूबाट स्थानान्तरण गरिएका सबै बिरामीलाई उत्कृष्ट चिकित्सा सेवा उपलब्ध गराउन निर्देशन दिएका छन्।

मुख्यमन्त्रीले सरकार यस घटनालाई अत्यन्त गम्भीर रूपमा लिएको र छानबिनको आधारमा आवश्यक कारबाही गरिने बताएका छन्।

---------------

हिन्दुस्थान समाचार / भवानी थामी