नयाँ दिल्ली, ०९ मार्च (हि.स.)। विपक्षी सांसदहरूले पश्चिम एसियामा जारी सैन्य संघर्षबारे छलफल गराउन माग गर्दै गरेको हंगामाका कारण सोमबार लोकसभाको कार्यवाही दुई पटकसम्म स्थगित भएपछि अन्ततः मंगलबार बिहान ११ बजीसम्मका लागि स्थगित गरिएको छ।

लोकसभाको बैठक बिहान ११ बजी शुरु हुनेबित्तिकै विपक्षी सदस्यहरूले पश्चिम एसियामा बढ्दो तनाउ, भारतको ऊर्जा सुरक्षामा पर्न सक्ने प्रभाव र विदेशमा बसिरहेका भारतीयहरूको सुरक्षाको विषय उठाउँदै हंगामा शुरु गरे। यसका कारण सदनको कार्यवाही १२ बजीसम्मका लागि स्थगित गरिएको थियो।

अपराह्न ३ बजी फेरि कार्यवाही शुरु हुँदा पनि विपक्षी सदस्यहरूको हंगामा जारी रह्यो। विपक्षले पश्चिम एसियामा बढ्दो तनाउले भारतको ऊर्जा सुरक्षा तथा विदेशमा रहेका भारतीयहरूमा असर पर्न सक्ने भन्दै सरकारले स्पष्ट जवाफ दिनुपर्ने माग गरेको थियो।

टीएमसीकी सांसद महुआ मोइत्राले नाराबाजी गरेपछि अध्यक्षता गरिरहेका जगदम्बिका पाल असन्तुष्ट भए र उनले विपक्षी सदस्यहरूलाई बारम्बार शान्त रहन आग्रह गरे। उनले विदेशमन्त्रीले स्थिति स्पष्ट गरिसकेको र भारतीयहरूको सुरक्षा तथा ऊर्जा आपूर्तिबारे आवश्यक कदमहरूको जानकारी दिइसकेको बताए।

सरकारको तर्फबाट भनियो, विपक्षले लोकसभा अध्यक्ष ओम बिर्ला विरुद्ध अविश्वास प्रस्ताव ल्याएको छ र त्यसबारे छलफल गर्न सदन तयार छ। तर विपक्षले अर्को प्रस्ताव पेश गर्यो, जसमा विदेशमन्त्री एस. जयशंकरले जवाफ दिएका थिए। त्यसपछि निरन्तर हंगामा र नाराबाजीका कारण सदनको कार्यवाही मंगलबार बिहान ११ बजीसम्मका लागि स्थगित गरियो।

एआईएमआईएमका असदुद्दीन ओवैसीसहित धेरै सांसदहरूले पश्चिम एसियाको अवस्थाबारे सरकारसँग स्पष्टीकरण माग गरेका थिए।

विदेशमन्त्री जयशंकरले पहिले राज्यसभामा र त्यसपछि लोकसभामा सम्बोधन गर्दै खाडी देशहरूबाट भारतीयहरूको फिर्ता तथा सम्भावित ऊर्जा संकटसँग जुध्न गरिएका तयारीबारे जानकारी दिए। उनले भने, हाल इरानी नेतृत्वसँग सम्पर्क गर्न कठिन भए पनि भारत शान्ति र संवादको पक्षमा रहेको छ।

राज्यसभामा उनको सम्बोधनका क्रममा विपक्षले वाकआउट गरेको थियो भने लोकसभामा विपक्षी सांसदहरूले “वी वान्ट डिस्कसन” भन्दै नाराबाजी गर्दै हंगामा जारी राखेका थिए। पीठासीन अधिकारीले बारम्बार सम्झाए पनि विपक्ष शान्त नभएपछि निरन्तर हंगामाका कारण अन्ततः लोकसभाको कार्यवाही दिनभरका लागि स्थगित गरिएको हो।

---------------

हिन्दुस्थान समाचार / भवानी थामी