दार्जिलिङ, 02 अप्रेल (हि.स.)। भारतीय गोर्खा प्रजातान्त्रिक मोर्चका अध्यक्ष अनित थापाले दार्जिलिङस्थित महाकाल बाबा धामबाट दार्जिलिङका मतदाताहरूलाई सम्बोधन गर्दै आगामी विधानसभा चुनाउमा शिक्षित र दक्ष उम्मेदवारलाई मत दिन आह्वान गरेका छन्।

थापाले भने, यो चुनाउ बंगाललाई पहाडले एउटा स्पष्ट सन्देश दिने अवसर हो कि पहाडको जनताले शिक्षित र दक्ष व्यक्तिको नेतृत्व चाहन्छ। उनले चुनाउ शान्तिपूर्ण ढंगले सम्पन्न होस् भन्ने कामना गर्दै पहाडमा विगतमा आफ्नो नेतृत्वमा ल्याएको शान्तिको उपलब्धिमाथि प्रकाश पारे। उनले पहाड अहिले शान्तिपश्चात समृद्धिको बाटोमा अगाडि बढिरहेको दाबी गरे।

पहिले शहर र बजारमा मात्र सीमित रहेको समृद्धि अब कमान र बस्तीस्तरसम्म पुग्न थालेको उनको भनाइ छ। रोजगारीको प्रश्नमा थापाले नकारात्मक मानसिकतालाई समस्याको मूल कारण ठहर्याउँदै भने, पहाडमा रोजगारका पर्याप्त अवसर विद्यमान छन्, जसको प्रमाण बाहिरका मानिसहरू यहाँ आएर काम गर्दछन् भन्ने तथ्यले नै दिन्छ।

थापाले पार्टी उम्मेदवार विजयकुमार राईको प्रशंसा गर्दै भने, राई एक शिक्षित व्यक्ति हुन् र उनको पूरै परिवार नै शिक्षित छन्। मतदाताहरूले उम्मेदवारको प्रोफाइल, विश्वसनीयता र योग्यता हेरेर मतदान गर्नुपर्छ। विधानसभामा पुग्ने विधायकको शैक्षिक योग्यताले पश्चिम बंगाल सरकारमा पहाडप्रतिको धारणा निर्माण गर्ने भएकाले यो चुनाउ विशेष महत्त्वपूर्ण छ।

अर्कोतिर भारतीय गोर्खा प्रजातान्त्रिक मोर्चाको उम्मेदवार विजय कुमार राईले भने, अहिले पहाडमा शान्ति छाएको छ र यो शान्तिलाई स्थायी रूपमा कायम राख्न सक्षम पार्टी भारतीय गोर्खा प्रजातान्त्रिक मोर्चा मात्र हो।

हिन्दुस्थान समाचार / हनोक