वाशिङ्टन, 19 मई (हि.स.)। संयुक्त राज्य अमेरिकाको क्यालिफोर्निया राज्यस्थित सेन डिएगोमा रहेको इस्लामिक सेन्टर परिसरभित्र मस्जिद नजिक सोमबार भएको गोलीकाण्डमा तीन जनाको मृत्यु भएको छ। दाबी अनुसार, उक्त घटना दुई जना नाबालिग बन्दुकधारीहरूले गराएका थिए। त्यसपछि उनीहरूले नजिकैको गल्लीमा गएर आफूलाई गोली हानी आत्महत्या गरेका छन्।

घटनाको जानकारी पाएपछि इस्लामिक सेन्टर पुगेको पुलिसले केही समयका लागि स्थानीय बासिन्दाहरूलाई घरभित्रै बस्न आग्रह गरेको थियो। सेन डिएगोका पुलिस प्रमुख स्कट वाहलले घटनाको पुष्टि गरेका छन्।

सीबीएस न्यूजको रिपोर्टअनुसार, वरिष्ठ पुलिस अधिकारी स्कट वाहलले दुई संदिग्ध आक्रमणकारी नजिकैको गाडीभित्र मृत अवस्थामा फेला परेको बताएका छन्। संदिग्धहरूको उमेर १७ र १८ वर्ष रहेको जनाइएको छ। वाहलका अनुसार, घटनाको अनुसन्धान “हेट क्राइम” अर्थात् घृणासँग सम्बन्धित अपराधको रूपमा भइरहेको छ।

सेन डिएगो इस्लामिक सेन्टरका इमाम ताहा हस्सानले मानिसहरूलाई घृणा त्यागेर सद्भावपूर्वक बस्न अपील गरेका छन्। उक्त परिसरमा मदरसा (विद्यालय) पनि रहेको र गोलीबारी हुँदा बालबालिका अध्ययनरत रहेको बताइएको छ। गोली चलेपछि परिसरमा हलचल मच्चिएको थियो।

पुलिस प्रमुख स्कट वाहलले पहिलो सूचना बिहान करिब ११:४३ बजी प्राप्त भएको जानकारी दिए। उनले बताएअनुसार, घटनाभन्दा दुई घण्टा अघि एक महिलाले आफ्ना छोरा हराएको र उनीसँग धेरै हतियार रहेको जानकारी पुलिसलाई दिएकी थिइन्। साथै, उनको गाडी पनि हराएको बताइएको थियो।

पुलिसका अनुसार, इस्लामिक सेन्टरलाई यसअघि कुनै धम्की प्राप्त भएको थिएन। घटनाको सबै पक्षबाट अनुसन्धान भइरहेको छ। इमाम ताहा हसनले पत्रकार सम्मेलनमा मुस्लिम समुदाय यस घटनाबाट स्तब्ध र शोकमा रहेको बताए। उनले भने, “यो यस्तो घटना हो, जसको हामीले कहिल्यै कल्पना गरेका थिएनौं।”

यस हमलामा इस्लामिक सेन्टरका एक सुरक्षा गार्डको पनि मृत्यु भएको छ। पुलिसले उनको पहिचान सार्वजनिक गरेको छैन।

सेन डिएगोका मेयर टड ग्लोरियाले अब पूजा स्थलहरूको सुरक्षाका लागि पुलिस तैनाथ गरिने बताएका छन्। क्यालिफोर्नियाका गभर्नर गेभिन न्युसमले घटनाप्रति दुःख व्यक्त गर्दै क्यालिफोर्नियामा घृणाका लागि कुनै स्थान नभएको बताएका छन्। उनले धार्मिक समुदायमाथिको हिंसा सह्य नहुने पनि स्पष्ट पारे।

उल्लेखनीय छ, अमेरिकामा यसअघि पनि पूजा स्थलहरूमा आक्रमणका घटना हुँदै आएका छन्। यस वर्षको शुरुवातमा मिशिगनस्थित एक सिनेगग (यहूदी प्रार्थना स्थल) लाई पनि निशाना बनाइएको थियो।

टेम्पल इजरायलले सामाजिक सञ्जालमार्फत सेन डिएगो इस्लामिक सेन्टरमा भएको घटनाको निन्दा गरेको छ। उक्त सिनेगगका रब्बी हाल वाशिङ्टनमा रहेका छन् र अमेरिकाभर पूजा स्थलहरूको सुरक्षाका लागि सहयोग जुटाउने अभियानमा सक्रिय छन्। उनीहरूको लक्ष्य एक अरब डलर संकलन गर्ने रहेको बताइएको छ।

---------------

हिन्दुस्थान समाचार / बिशाल