गान्तोक, 19 मई (हि.स.)। सिक्किम सरकारको खेलकुद तथा युवा मामिला विभाग अन्तर्गतको सिक्किम युवा विकास बोर्डले नागाल्याण्ड सरकारको युवा संसाधन तथा खेलकुद निर्देशनालयसँगको सहकार्यमा आज गान्तोकको स्थानीय एक होटलमा युवा आदानप्रदान कार्यक्रम अन्तर्गत सांस्कृतिक कार्यक्रम आयोजना गर्‍यो।

नागाल्याण्डका चार अधिकारीहरूसहित जम्मा २५ विद्यार्थीहरू सिक्किमको युवा एक्सपोजर भ्रमणमा छन्। सिक्किम भ्रमणका क्रममा विद्यार्थीहरूले झॉंक्री फल्स, चुक्लाखाङ प्यालेस, ह्वाइट हल, नथुला पास र अर्किडेरियम लगायत सांस्कृतिक र ऐतिहासिक महत्त्वका ठाउँहरूको भ्रमण गर्नेछन्।

राज्य खेलकुद विभागकी सचिव याङछेन डी. तामाङले आफ्नो सम्बोधनमा नागाल्याण्डका अधिकारीहरू र विद्यार्थीहरूलाई स्वागत गर्दै यो कार्यक्रम देशको समृद्ध विविधताबीच एकता प्रवर्द्धन गर्न एक बहुमूल्य मञ्च रहेको बताइन्। उनले भारतको शक्ति यसको विविधतामा निहित रहेको बताइन्।

सचिवले भनिन्, सिक्किम र नागाल्याण्डले संस्कृति, परम्परा र भूगोलको हिसाबले धेरै समान तत्वहरू साझा गर्छन्। यो कार्यक्रमले दुई राज्यका युवाहरूबीच मित्रता र समझदारीलाई सुदृढ बनाउने उनले आशा व्यक्त गरिन्। उनले भ्रमण प्रतिनिधिमण्डललाई सिक्किममा सुखद बसाइको कामना पनि गरिन्।

नागाल्याण्ड सरकारको युवा संसाधन तथा खेलकुद विभागका निर्देशक केथोसितुओ सेखोसेले आफ्नो सम्बोधनमा नागाल्याण्डको समृद्ध संस्कृति, परम्परा र इतिहासको बारेमा जानकारी गराए। उनले भने, यस्ता कार्यक्रमहरूले विभिन्न सांस्कृतिक पृष्ठभूमिका युवाहरूलाई एकसाथ आउन र एकअर्काबाट सिक्ने अवसर प्रदान गर्दछ।

हिन्दुस्थान समाचार / बिशाल