गान्तोक, 27 जून (हि.स.)। विशेष गहन पुनरीक्षण (एसआईआर) 2026 अन्तर्गत गान्तोक जिल्लाले गणना फाराम (ईएफ) को ८८.४ प्रतिशत डिजिटाइजेशन सम्पन्न गरेको छ। हालसम्म १,०८,०५५ गणना फाराम डिजिटाइज गरिएको छ।
गान्तोक जिल्लाले गणना फाराम वितरणमा पनि उल्लेखनीय प्रगति हासिल गरेको छ। कुल १,२२,२४० योग्य मतदाता मध्ये १,२१,८५२ जनालाई गणना फाराम वितरण गरिएको छ, जसले ९९.६८ प्रतिशत वितरण दर हासिल भएको जनाउँछ।
जिल्लाको दुर्गम भौगोलिक अवस्थाका बावजुद बुथ लेभल अफिसरहरूले ज्येष्ठ नागरिक तथा दिव्याङ्गसहित सबै योग्य मतदातासम्म पुगेर निरन्तर कार्य गरेकाले यो उपलब्धि सम्भव भएको बताइएको छ।
मतदातामा जनचेतना अभिवृद्धि गर्न तथा उनीहरूको सक्रिय सहभागिता सुनिश्चित गर्न निर्वाचन विभागले मोबाइल भ्यानमार्फत माइकिङ अभियान सञ्चालन गरेको छ। यस अभियानमार्फत गणना फाराम वितरण तथा सङ्कलनका क्रममा बीएलओहरूसँग सहयोग गर्न मतदाताहरूलाई आग्रह गरिएको छ। साथै, भारत निर्वाचन आयोगले निर्धारण गरेको समयसीमाभित्र कार्य सम्पन्न गर्न बीएलओहरूले डिजिटाइजेशन प्रक्रियालाई पनि तीव्र बनाएका छन्।
बीएलओहरूद्वारा गणना फाराम वितरण तथा सङ्कलन कार्य २८ जून, २०२६ मा सम्पन्न हुनेछ। त्यसैले सबै योग्य मतदाताहरूलाई निर्धारित समयभित्र विधिवत् भरिएको गणना फाराम आफ्नो सम्बन्धित बीएलओलाई बुझाई मस्यौदा मतदाता नामावलीमा आफ्नो नाम समावेश हुने सुनिश्चित गर्न अनुरोध गरिएको छ।
हिन्दुस्थान समाचार / बिशाल
