गान्तोक, 29 जून (हि.स.)। शहरी विकास विभागले आज टोयोटा किर्लोस्कर मोटर प्रालिसँग अत्याधुनिक ढल तथा फोहोर संकलन उपकरण आपूर्तिका लागि समझदारीपत्र (एमओयू) मा हस्ताक्षर गरेको छ। विभागको सम्मेलन कक्षमा आयोजित कार्यक्रममा शहरी विकास तथा खाद्य एवं नागरिक आपूर्ति मन्त्री भोजराज राई प्रमुख अतिथिका रूपमा उपस्थित थिए।
यो पहल टोयोटा किर्लोस्कर मोटर प्रालिको आर्थिक वर्ष २०२६-२७ को कर्पोरेट सामाजिक उत्तरदायित्व कार्यक्रमअन्तर्गत सिक्किमलाई म्यानुअल स्क्याभेन्जिङ (हातैले ढल सफाइ गर्ने प्रथा) मुक्त बनाउने राज्य सरकारको प्रतिबद्धतालाई सहयोग पुर्याउने उद्देश्यले अघि बढाइएको हो। यस परियोजनामार्फत आधुनिक यान्त्रिक उपकरणको प्रयोग गरी सरसफाई पूर्वाधारलाई सुदृढ़ बनाउँदै हातैले गरिने जोखिमपूर्ण कार्यमा निर्भरता घटाउने, साथै सरसफाई कर्मीहरूको सुरक्षा, कार्यदक्षता र सम्मान अभिवृद्धि गर्ने लक्ष्य राखिएको छ।
समारोहलाई सम्बोधन गर्दै मन्त्री भोजराज राईले यस महत्वपूर्ण पहलमा राज्य सरकारसँग सहकार्य गरेकोमा टोयोटा किर्लोस्कर मोटर प्रालिप्रति आभार व्यक्त गरे। उनले आधुनिक प्रविधिको प्रयोगले सरसफाई सेवाको गुणस्तरमा उल्लेखनीय सुधार ल्याउनुका साथै सरसफाई कर्मीहरूको स्वास्थ्य र सुरक्षाको संरक्षण हुने विश्वास व्यक्त गरे। उनले प्रविधि मात्र पर्याप्त नहुने उल्लेख गर्दै उपकरणको प्रभावकारी सञ्चालन, मर्मतसम्भार तथा दीर्घकालीन उपयोग सुनिश्चित गर्न सम्बन्धित जनशक्तिलाई व्यापक तालिम प्रदान गर्नुपर्नेमा जोड दिए।
शहरी विकास विभागका आयुक्त एवं सचिव जितेन्द्र सिंह राजेले जोखिमपूर्ण पेशामा प्रविधिको प्रयोगमार्फत समावेशिता प्रवर्द्धन र मानव सम्मानको संरक्षण गर्ने मुख्यमन्त्री प्रेमसिंह तामाङको दूरदर्शी सोचबारे प्रकाश पारे। उनले जोखिमपूर्ण म्यानुअल अभ्यासलाई आधुनिक यान्त्रिक प्रणालीद्वारा प्रतिस्थापन गर्नु सुरक्षित कार्य वातावरण र गुणस्तरीय शहरी सरसफाई सेवा सुनिश्चित गर्ने राज्य सरकारको प्रतिबद्धताको प्रतीक भएको बताए। साथै उन्नत रोबोटिक सरसफाई उपकरणको सञ्चालन, अनुगमन र मर्मतसम्भारमा डिजिटल प्रविधिको प्रभावकारी प्रयोगले सेवा प्रवाहलाई थप पारदर्शी, उत्तरदायी र प्रभावकारी बनाउने उल्लेख गरे।
हिन्दुस्थान समाचार / बिशाल
