- प्रधानमन्त्री नरेन्द्र मोदी र केन्द्र सरकारले उत्तर पूर्वको विकासलाई उच्च प्राथमिकता दिएका छन्: मुरुगन

गान्तोक, 03 जून (हि.स.)। केन्द्रिय सूचना तथा प्रसारण तथा संसदीय मामिला राज्यमन्त्री डा. एल. मुरुगनले मिजोरमको आफ्नो आधिकारिक भ्रमणको क्रममा आज कोलासिब जिल्लाको भ्रमण गरेका छन्। भ्रमणको क्रममा उनले विभिन्न गैरसरकारी संस्थाका प्रतिनिधिहरूसँग अन्तरक्रियात्मक सत्र गर्नुका साथै जिल्लामा कार्यान्वयन भइरहेका विकास कार्यहरूको प्रगतिको समीक्षा गरे। समीक्षा बैठकमा कोलासिबका उपायुक्त एच. डोलियानबुइया र विभिन्न विभागका कार्यालय प्रमुखहरू उपस्थित थिए। उक्त जानकारी आज पीआईबीले दिएको छ।

सभालाई सम्बोधन गर्दै डा. एल. मुरुगनले प्रधानमन्त्री नरेन्द्र मोदी र केन्द्र सरकारले उत्तर पूर्वको विकासलाई उच्च प्राथमिकता दिएको बताए। प्रधानमन्त्रीलाई उद्धृत गर्दै उनले भने, उत्तर पूर्वको विकास भारतको विकास हो। उनले यस क्षेत्रका जनताको जीवन स्तर सुधार गर्न सडक सम्पर्क र पूर्वाधारलाई मजबुत पार्न पर्याप्त प्रयास भइरहेको उल्लेख गरे। मन्त्रीले जनताको सेवा गर्ने र जिल्लाको विकासमा योगदान पुर्‍याउने सरकारी अधिकारी र गैरसरकारी संस्थाका प्रतिनिधिहरूको समर्पित प्रयासको प्रशंसा गरे।

उनले खेलकुद र महिला सशक्तिकरणको क्षेत्रमा हासिल भएको प्रगतिप्रति सन्तुष्टि व्यक्त गरे। सम्पर्क सञ्जालमा भएको सुधारलाई उजागर गर्दै डा. मुरुगनले बैरबी-साइरङ रेलवे लाइन सञ्चालनमा आएको र राजधानी एक्सप्रेस अब दिल्ली र साइरङबीच चलिरहेको उल्लेख गरे। उनले भने, उन्नत सम्पर्क सञ्जालले मिजोरममा पर्यटनलाई उल्लेखनीय रूपमा बढाएको छ र देशका अन्य भागहरूबाट यहाँ आगन्तुकहरूको आगमन बढेको छ।

मन्त्रीले जोड दिॅंदै भने, मिजोरम सरकार, भारत सरकार र उत्तर पूर्वी क्षेत्र विकास मन्त्रालय (डोनर) ले राज्यको विकासलाई तीव्र बनाउनका लागि निकट समन्वयमा काम गरिरहेका छन्। केन्द्र सरकारको निरन्तर सहयोगले विभिन्न क्षेत्रहरूमा द्रुत प्रगतिलाई सक्षम बनाएको छ।

डा. मुरुगनले भारतको अन्तरराष्ट्रिय फिल्म महोत्सव (आईएफएफआई), गोवा र अन्य राष्ट्रिय प्लेटफर्महरूमा मिजो फिल्म निर्माताहरूको सहभागितामा पनि खुशी व्यक्त गरे। उनले भने, अग्रणी फिल्म निर्माताहरूलाई मिजोरमको दृश्यात्मक सुन्दरता र पर्यटन सम्भावनालाई ध्यानमा राख्दै फिल्मी गन्तव्यको रूपमा अन्वेषण गर्न प्रोत्साहित गर्न प्रयास गरिनेछ। उनले थप जनाए अनुसार सरकार विकास र रोजगारी सिर्जनाको लागि महत्त्वपूर्ण क्षेत्रको रूपमा पर्यटन र सिनेमा दुवैलाई प्रवर्द्धन गर्न प्रतिबद्ध छ।

राष्ट्रिय पहलहरूमा अधिक जनसहभागिताको लागि आह्वान गर्दै मन्त्रीले छतको सौर्य ऊर्जा अपनाउने उद्देश्यले प्रधानमन्त्री सूर्य घर मुफ्त बिजली योजनाको कार्यान्वयनलाई सक्रिय रूपमा समर्थन गर्न सरोकारवालाहरूलाई आग्रह गरे।

शिक्षाको बारेमा डा. मुरुगनले शिक्षण र विकासको आधारको रूपमा प्राथमिक शिक्षाको महत्त्वमाथि जोड दिए। विद्यार्थीले स्कूल छोड्ने दरमाथि चिन्ता व्यक्त गर्दै उनले बालबालिकाहरूलाई उनीहरूको शिक्षा जारी राख्न प्रोत्साहित गर्न अभिभावक, शिक्षक र समुदायबाट एकीकृत प्रयासको लागि आह्वान गरे।

मन्त्रीले सबै सरोकारवालाहरूलाई विकसित भारत २०४७ को दृष्टिकोणलाई साकार पार्नका लागी पूर्ण हृदयले योगदान गर्न पनि अपील गरे, जसले भारतलाई यसको स्वतन्त्रताको शताब्दीसम्ममा पूर्ण विकसित राष्ट्रमा रूपान्तरण गर्ने लक्ष्य राखेको छ।

हिन्दुस्थान समाचार / बिशाल