टोकियो, १८ जुलाई (हि.स.)। भारतकी स्टार ब्याडमिन्टन खेलाडी पीभी सिन्धुले उत्कृष्ट प्रदर्शन गर्दै जापान ओपन २०२६ को फाइनलमा स्थान सुरक्षित गरेकी छन्। शनिबार भएको सेमिफाइनल खेलमा चीनकी विश्व नम्बर-४ चेन युफेई चोटका कारण खेल पूरा गर्न नसकेपछि सिन्धुलाई विजेता घोषित गरिएको हो।
खेल रोकिँदासम्म सिन्धुले पहिलो सेट २१-१९ ले जितिसकेकी थिइन् भने दोस्रो सेटमा १५-१० को अग्रता लिइरहेकी थिइन्। यही क्रममा चेन युफेई ह्यामस्ट्रिङ चोटबाट पीडित देखिइन् र खेल त्याग्ने निर्णय गरिन्।
पहिलो सेटमा कडा प्रतिस्पर्धापछि सिन्धुको अग्रता
सिन्धुले आक्रामक शैलीमा खेलको सुरुआत गर्दै पहिलो सेटको मध्यसम्म चार अङ्कको अग्रता बनाएकी थिइन्। तर पूर्व ओलम्पिक च्याम्पियन चेन युफेईले उत्कृष्ट पुनरागमन गर्दै स्कोर १९-१९ को बराबरीमा पुर्याइन्।
दबाउपूर्ण अवस्थामासमेत सिन्धुले धैर्यता कायम राख्दै पहिलो सेट २१-१९ ले आफ्नो पक्षमा पारिन्।
दोस्रो सेटमा सिन्धुको बर्चस्व
दोस्रो सेटमा पनि सिन्धुले शुरुदेखि नै खेलमाथि नियन्त्रण कायम राखिन्। उनले १५-१० को बलियो अग्रता बनाएकी थिइन्। त्यसपछि चेन युफेई चोटका कारण खेलबाट बाहिरिइन् र सिन्धुले फाइनलमा स्थान बनाइन्।
उत्कृष्ट पुनरागमनको यात्रा जारी
यस जितसँगै ३१ वर्षीया सिन्धुको उत्कृष्ट लय कायम रहेको छ। उनले सन् २०२६ को शुरुआत विश्व वरीयताको १८औँ स्थानबाट गरेकी थिइन्। तर लगातार राम्रो प्रदर्शनका कारण शीर्ष-१० मा पुनरागमन गर्दै हाल विश्व नम्बर-९ बन्न सफल भएकी छन्।
फाइनलमा कससँग हुनेछ भिडन्त?
जापान ओपनको उपाधि भिडन्तमा सिन्धुले जापानकी अकाने यामागुची र इन्डोनेसियाकी पुत्री कुसुमा वारदानी बीचको दोस्रो सेमिफाइनलको विजेतासँग प्रतिस्पर्धा गर्नेछिन्।
भारतकी स्टार शटलर सिन्धु लामो समयपछि सुपर ७५० स्तरको उपाधि जित्ने लक्ष्यसहित फाइनलमा उत्रिनेछिन्।
हिन्दुस्थान समाचार / बिशाल
