न्युयोर्क, १८ जुलाई (हि.स.)। फिफा विश्वकप २०२६ को फाइनलअघि अर्जेन्टिनाका महान फुटबलर लियोनेल मेसीले स्पेनका युवा स्टार लामिन यामलको खुलेर प्रशंसा गरेका छन्। मेसीले यामल असाधारण प्रतिभाका खेलाडी भएको बताउँदै भविष्यमा इतिहास रच्ने क्षमता रहेको उल्लेख गरे। यद्यपि उनले मुस्कुराउँदै फाइनलमा भने त्यस्तो हुन नदिन आफूहरूले प्रयास गर्ने बताए।
फाइनलको पूर्वसन्ध्यामा फिफाले न्युयोर्कस्थित हडसन नदी किनारको जाभिट्स सेन्टरमा विशेष कार्यक्रम आयोजना गरेको थियो। कार्यक्रममा मेसी, अर्जेन्टिनाका मुख्य प्रशिक्षक लियोनेल स्कालोनी, गोलरक्षक एमिलियानो मार्टिनेज, स्पेनका मुख्य प्रशिक्षक लुइस डे ला फुएन्ते तथा कप्तान रोद्री सहभागी थिए।
कार्यक्रमको सञ्चालन इङ्ग्ल्यान्डका पूर्व फुटबलर रियो फर्डिनान्ड र हास्य कलाकार केभिन हार्ट ले गरेका थिए। साथै टेनिस स्टार नोभाक जोकोभिच, एनएफएलका दिग्गज टम ब्रेडी र एनबीएका स्टार केभिन ड्युरान्ट ले खेलाडीहरूसँग अन्तरक्रिया गरेका थिए।
यामललाई बताए उत्कृष्ट खेलाडी
कार्यक्रमका क्रममा टम ब्रेडीले चर्चित तस्वीरको प्रसंग उठाए, जसमा २० वर्षका मेसी एक च्यारिटी फोटोसुटका बेला बालक लामिन यामललाई नुहाइरहेको देखिएका थिए।
यस विषयमा मेसीले भने, लामिन साँच्चिकै उत्कृष्ट खेलाडी हुन्। म उनलाई लामो समयदेखि नियालिरहेको छु, किनभने उनी त्यही क्लबका लागि खेल्छन्, जससँग मेरो विशेष लगाव छ। उनीसँग इतिहास रच्ने अवसर छ। तर यस पटक भने हामी त्यस्तो हुन नदिन प्रयास गर्नेछौं।
उनले मुस्कुराउँदै थपे,
हामी राम्रो खेल खेल्न चाहन्छौं, तर आशा छ कि उनी र उनको टोलीले धेरै राम्रो प्रदर्शन नगरून्।
स्कालोनीद्वारा स्पेनका प्रशिक्षकको प्रशंसा
कार्यक्रमपछि अर्जेन्टिनाका मुख्य प्रशिक्षक लियोनेल स्कालोनीले स्पेनका प्रशिक्षक लुइस डे ला फुएन्तेलाई भेटेर अँगालो मारेका थिए। त्यसपछि स्कालोनीले भने, म यहाँ केवल लुइसका कारण आएको हुँ। म उहाँको अत्यन्त सम्मान गर्छु र उहाँको प्रशंसा गर्छु।
विश्वकप फाइनलअघि आयोजित यस कार्यक्रममा फुटबल तथा अन्य खेलका धेरै चर्चित व्यक्तित्वहरू एउटै मञ्चमा देखिएका थिए। उता अर्जेन्टिनाको टोली लगातार दोस्रो पटक विश्वकप उपाधि जित्ने लक्ष्यसहित फाइनलमा मैदान उत्रिने तयारीमा छ।
हिन्दुस्थान समाचार / बिशाल
