गान्तोक, 27 जुलाई (हि.स.)। राजधानीको मनन केन्द्रमा आज आठौँ राज्यस्तरीय सारथी सम्मान दिवस २०२६ भव्यरूपमा मनाइयो। 'उत्तरदायित्व र सडक सुरक्षाको यात्रा जारी राखौं' नाराका साथ पालन गरिएको कार्यक्रममा मुख्यमन्त्री प्रेमसिंह तामाङ मुख्य अतिथिका रूपमा उपस्थित थिए।
मुख्यमन्त्री तामाङले आफ्नो सम्बोधनमा सारथी सम्मान दिवसको यात्रामाथि प्रकाश पार्दै यो अवसर राज्यका चालक समुदायको अमूल्य योगदानलाई सम्मान र मान्यता दिन समर्पित रहेको उल्लेख गरे। सिक्किमको प्रगतिमा सारथीहरूको निर्णायक भूमिकाबारे बोल्दै उनले राज्यको विकासात्मक पहलहरूको सफल कार्यान्वयनमा उनीहरूको समर्पित सेवाले ठूलो सहयोग पुऱ्याएको बताए।
मुख्यमन्त्रीले विभिन्न कल्याणकारी पहलहरू मार्फत आत्मनिर्भरता प्रवर्द्धन र सारथीहरूको समग्र जीवन स्तर सुधार गरेर चालक समुदायलाई सशक्त बनाउन राज्य सरकारको निरन्तर प्रयासहरूको बारेमा पनि अवगत गराए। उनले सारथीहरूका परिवारको शिक्षा, कल्याण र समग्र कल्याणमा सहयोग गर्ने सरकारको प्रतिबद्धता दोहोऱ्याए।उनले विधायक सञ्जित खरेलले राखेका माग र गुनासोहरूलाई सम्बोधन गर्दै चालक समुदायका समस्या समाधानका लागि सरकारले निरन्तर काम गर्ने आश्वासन दिए।
यस अघि विधायक मदन सिन्चुरीले आफ्नो सम्बोधनमा कार्यक्रमले चालक समुदायका सदस्यहरूलाई एकै ठाउँमा ल्याउन र उनीहरूको योगदानलाई मनाउने मञ्चको रूपमा काम गरेको बताए। उनले राज्यमा चालक समुदायलाई बलियो बनाउनको लागि निरन्तर सहयोग र प्रयासको लागि मुख्यमन्त्रीलाई धन्यवाद दिए।
यसैगरी, विधायक सञ्जित खरेलले सारथी समुदायलाई सरकारद्वारा प्रदान गरिएका विभिन्न सुविधाहरू र कल्याणकारी पहलहरूबारे प्रकाश पारे। उनले चालक समुदायको तर्फबाट बोल्दै विभिन्न माग र गुनासोहरू मुख्यमन्त्रीसमक्ष विचारका लागि राखेका थिए।
कार्यक्रममा मुख्यमन्त्रीलाई यातायात विभागका प्रतिनिधिहरू, मोटर वाहन प्रभागका अधिकारीहरू, क्षेत्रीय यातायात अधिकारीहरू, सारथी कल्याणकारी बोर्ड र राज्य चालक मोर्चाका सदस्यहरूले सम्मान गरेका थिए। मुख्यमन्त्री गेजिङ बर्मेकका लक्ष्मण छेत्रीलाई बोलेरो हस्तान्तरण गरे। उनले ६ वटै जिल्लाका १२ जना सारथीलाई उत्कृष्ट सारथी पुरस्कार प्रदान गरे उत्कृष्ट सेवाको कदरस्वरुप १२ जनालाई वेगन आर गाडी वितरण गरे।
मुख्यमन्त्रीले सिक्किमलगायत कालेबुङ, दार्जिलिङ र सिलगढीका चालक संघहरूलाई पनि सम्मानित गरे। उनले पिङ्क सिटी रनरका ड्राइभर र कन्डक्टरहरूलाई पनि सम्मानित गरे भने छिरिङ याङ्छेन भोटियालाई उत्कृष्ट कन्डक्टरको अवार्ड प्रदान गरे। उनले ट्रक, ट्याङ्कर र बस विधामा उत्कृष्ट प्रदर्शन गर्ने एसएनटीका चालकहरू, उत्कृष्ट अनुशासित चालकहरूलाई पनि समेत सम्मान गरे।
यस अतिरिक्त, मुख्यमन्त्रीले दुर्घटनामा ज्यान गुमाएका चालकका सात परिवारलाई अनुग्रह स्वरूप ५ लाख रुपियाँ सहयोग प्रदान गरे।
हिन्दुस्थान समाचार / बिशाल
