तेहरान, 0५ जुलाई (हि.स.)। इरानका राष्ट्रपति मसुद पेजेश्कियानले इस्लामी क्रान्तिका दिवंगत नेता अयातुल्लाह सैयद अली खामेनेईको मार्गदर्शनले विश्वभरका राष्ट्रहरूलाई निरन्तर प्रेरित गरिरहने बताएका छन्। उनले एकता, सम्मान, स्वतन्त्रता र प्रतिरोधको सन्देश अहिले पहिलेभन्दा अझ सशक्त रूपमा गुञ्जिरहेको उल्लेख गर्दै सबै मुस्लिम राष्ट्रहरूलाई एकजुट हुन आह्वान गरेका छन्।

इरना समाचार एजेन्सीका अनुसार, शनिबार तेहरानमा आयोजित इमाम खामेनेई: प्रतिरोधका अमर नेता विषयक अन्तरराष्ट्रिय सम्मेलनलाई सम्बोधन गर्दै राष्ट्रपति पेजेश्कियानले मुस्लिम राष्ट्रहरूबीच एकताको आवश्यकता औँल्याए। उनले इस्लामी क्रान्तिका दिवंगत नेताको स्मृतिमा आयोजित कार्यक्रममा सहभागी स्वदेशी तथा विदेशी प्रतिनिधिहरूलाई स्वागत गर्दै यस भेलाले मुस्लिम विश्वमा ऐक्यबद्धता सुदृढ़ गर्ने तथा विश्वव्यापी अहंकार, हिंसा, आतंकवाद र प्रभुत्ववादी नीतिविरुद्ध थप सहकार्य बढाउने विश्वास व्यक्त गरे।

राष्ट्रपतिले अयातुल्लाह खामेनेईको निधनलाई दुःखद तथा अपूरणीय क्षति बताए। उनले ईश्वरीय मार्गदर्शन प्राप्त नेताहरूका आदर्श र सन्देश उनीहरूको निधनसँगै समाप्त नहुने, बरु आगामी पुस्तालाई न्याय, सत्य र प्रतिरोधका आदर्शतर्फ प्रेरित गरिरहने बताए। उनका अनुसार, खामेनेईको मार्गदर्शनले इरानको सीमाभन्दा बाहिरका मानिसहरूलाई पनि प्रेरित गरेको छ।

उनले आज खामेनेईको मार्गदर्शनकै कारण एकता, सम्मान, स्वतन्त्रता र प्रतिरोधको सन्देश विभिन्न धर्म र देशका मानिसहरूबीच फैलिएको उल्लेख गरे। इस्लामी एकतालाई उनले केवल राजनीतिक नारा नभई रणनीतिक आवश्यकता भएको बताए। मुसलमानहरूको एउटै ईश्वर, एउटै पैगम्बर र एउटै पवित्र ग्रन्थ भएकाले सम्प्रदायगत वा राजनीतिक मतभेदले उनीहरूलाई विभाजित गर्न नहुने उनको भनाइ थियो।

राष्ट्रपति पेजेश्कियानले इस्लामी समाजको आधार भ्रातृत्व र मेलमिलापमा रहेको उल्लेख गर्दै इतिहासमा मुस्लिमहरूको शक्ति एकताबाटै आएको बताए। यदि मुस्लिम राष्ट्रहरू मिलेर काम गरे भने गाजा, लेबनान र फिलिस्तीन जस्ता स्थानहरूमा जारी द्वन्द्व र मानवीय संकटलाई रोक्न सकिने उनको धारणा थियो। उनले इस्लामी समूहहरूबीचको विभाजनले बाह्य शक्तिहरूलाई क्षेत्रीय तनाउको फाइदा उठाउने अवसर प्रदान गर्ने चेताउनी पनि दिए।

उनले इजरायली शासनका गतिविधि तथा त्यसलाई अमेरिकाले दिएको समर्थनको आलोचना गर्दै यस क्षेत्रमा बुद्धिजीवी, वैज्ञानिक तथा अन्य प्रभावशाली व्यक्तिहरूमाथि लक्षित हत्याहरू भइरहेको बताए। साथै, मानवअधिकारको संरक्षणको दाबी गर्ने अन्तरराष्ट्रिय संस्थाहरू यस्ता घटनाहरू रोक्न असफल भएको भन्दै उनले तिनको मौनतामाथि पनि प्रश्न उठाए। अन्त्यमा उनले न्यायको पक्षमा काम गर्ने, इस्लामी एकता सुदृढ़ गर्ने तथा आपसी एकतामार्फत क्षेत्रीय शान्ति प्रवर्द्धन गर्ने इरानको प्रतिबद्धता पुनः दोहोर्‍याए।

हिन्दुस्थान समाचार / बिशाल