अभिनेत्री तापसी पन्नू अब आफ्नो बहुप्रतीक्षित फिल्म ‘गान्धारी’ मार्फत दर्शकमाझ फर्किन तयार भएकी छन्। हाई-भोल्टेज एक्सन, अपराध र बदलाको कथामा आधारित यस थ्रिलर फिल्मको निर्देशन देवाशीष मखीजाले गरेका छन् भने कथा कनिका ढिल्लोनले लेखेकी छन्। कनिका ढिल्लोनको निर्माण संस्था कथा पिक्चर्सको ब्यानरमा बनेको यो फिल्म सिनेमा हलमा नभई सिधै डिजिटल प्लेटफर्ममा रिलिज हुनेछ। फिल्मको प्रिमियर ३ सेप्टेम्बर, २०२६ मा नेटफ्लिक्समा हुनेछ।

‘गान्धारी’ मा तापसी पन्नूले एउटी आमाको भूमिका निभाएकी छन्, जो आफ्नी छोरीलाई बचाउन जुनसुकै हदसम्म जान तयार हुन्छिन्। फिल्मको कथाले आमा-छोरीबीचको गहिरो तथा अटुट सम्बन्धसँगै बदला र संघर्षको भावनात्मक यात्रालाई प्रस्तुत गर्नेछ। फिल्ममा तापसीको भूमिकालाई उनले यसअघि निभाएका भूमिकाभन्दा निकै फरक र चुनौतीपूर्ण बताइएको छ। अभिनेत्रीले फिल्ममा जबरदस्त एक्सन गरेको पनि देख्न पाइनेछ।

फिल्मको स्टारकास्टमा तापसीसँगै इश्वाक सिंह, स्वास्तिका मुखर्जी, छाया कदम, जतिन सरना र मीता वशिष्ठजस्ता कलाकारहरू रहेका छन्। ‘गान्धारी’ को निर्देशन देवाशीष मखीजाले गरेका छन्, जो आफ्नो गम्भीर तथा प्रभावशाली कथा प्रस्तुत गर्ने शैलीका लागि परिचित छन्। त्यस्तै, कनिका ढिल्लोनको लेखन तथा निर्माणले फिल्मप्रति अपेक्षा बढाएको छ।

तापसीलाई अन्तिमपटक ‘अस्सी’ मा देखिएको थियो, जुन यसै वर्षको शुरुवातमा रिलिज भएको थियो। अब ‘गान्धारी’ मार्फत उनी एक्सन र भावनाले भरिएको नयाँ अवतारमा दर्शकमाझ प्रस्तुत हुँदैछिन्।

हिन्दुस्थान समाचार / बिशाल