गान्तोक, 27 अगस्त (हि.स.)। काबी लुङचोक निर्वाचन क्षेत्रको क्योङ्गनस्ला वार्ड अन्तर्गत ७ माइलमा पैह्रो तथा त्यसबाट आवासीय क्षेत्रमा परेको प्रभावको मूल्याङ्कन गर्न आज क्षेत्र विधायक थिन्ले छिरिङ भोटियाको नेतृत्वमा संयुक्त निरीक्षण गरिएको छ। निरीक्षण टोलीमा जिल्ला पञ्चायत, वार्ड पञ्चायतका जनप्रतिनिधिहरू, गान्तोक जिल्ला प्रशासन र विभिन्न विभागका अधिकारीहरूको उपस्थिति रहेको थियो।
टोलीले पैह्रो प्रभावित क्षेत्रको स्थलगत निरीक्षण गर्दै निरन्तर भइरहेको जमिनको हलचलका कारण आवासीय घरहरूमा पुगेको क्षतिको मूल्याङ्कन गर्यो। प्रभावित परिवारहरूलाई सुरक्षित स्थानमा स्थानान्तरण गर्न उपयुक्त क्षेत्र पहिचान गर्ने क्रममा ५ माइल, धुपीघारी, ८ माइल लगायत सम्भावित स्थानहरूको समेत निरीक्षण गरियो। यस क्रममा खानेपानीलगायत आवश्यक आधारभूत सुविधाको उपलब्धताबारे पनि छलफल गरिएको थियो।
क्षेत्र विधायक भोटियाले प्रभावित बासिन्दाहरूसँग अन्तरक्रिया गर्दै उनीहरूलाई सुरक्षित क्षेत्रमा स्थानान्तरण गर्न आवश्यक पहल भइरहेको जानकारी दिए। उनले प्रभावित परिवारप्रति मुख्यमन्त्रीको दृष्टिकोण र चासोको प्रशंसा गर्दै उनीहरूको सुरक्षा तथा पुनर्स्थापनाका लागि सबै सम्बन्धित निकायबीच समन्वय आवश्यक रहेको बताए।
जिल्ला प्रशासन केन्द्रले प्रभावित परिवारहरूको प्रस्तावित स्थानान्तरण तथा पुनर्स्थापनासम्बन्धी आवश्यक मूल्याङ्कन र थप कार्यलाई निरन्तरता दिने जनाएको छ।
---------------
हिन्दुस्थान समाचार / बिशाल
27 Aug 2026
