गान्तोक, 28 अगस्त (हि.स.)। पाङ ल्हाबसोल पर्वको पावन अवसरमा सिक्किमका राज्यपाल ओम प्रकाश माथुर आज चुक्लाखाङ प्यालेसमा आयोजित परम्परागत ‘पाङतोए छाम’ नृत्य समारोहमा सहभागी भए। समारोहमा मुख्यमन्त्री प्रेमसिंह तामाङ पनि उपस्थित थिए।
चुक्लाखाङ प्यालेस परिसरमा आगमनका क्रममा राज्यपाल माथुरलाई मुख्यमन्त्री प्रेमसिंह तामाङ, राजकुमार ग्याल्से पाल्देन ग्युरमेद नामग्याल तथा धर्म मामिला विभागका मन्त्री सोनाम लामाले स्वागत गरे। कार्यक्रममा विधायकगण, पूर्व राजपरिवारका सदस्यहरू, राज्य सरकारका वरिष्ठ अधिकारीहरू तथा चुक्लाखाङ ट्रस्टका पदाधिकारीहरूको पनि उपस्थिति थियो।
राज्यपाल माथुरले प्यालेस परिसरमा प्रस्तुत गरिएको परम्परागत ‘पाङतोए छाम’ नृत्यको अवलोकन गरे। सो अवसरमा उनले सिक्किमका रक्षक देवता महाकाल गोनपो र जोङ्गा ताक्सेसँग राज्यवासीको सुख, शान्ति, समृद्धि तथा आपसी सद्भावका लागि प्रार्थना गरे।
पाङ ल्हाबसोल पर्वले माउन्ट कञ्चनजङ्घालाई सिक्किमको रक्षक देवताका रूपमा सम्मान गर्नुका साथै राज्यको सांस्कृतिक एकतालाई अझ सुदृढ बनाउने सन्देश बोकेको छ। यस पर्वको प्रमुख आकर्षणका रूपमा रहेको ‘पाङतोए छाम’ नृत्यले नराम्रोमाथि राम्रोको विजय तथा सुरक्षा र संरक्षणको प्रतीकका रूपमा विशेष महत्त्व राख्छ।
राज्यपाल माथुरले सिक्किमको समृद्ध सांस्कृतिक विरासतको संरक्षण तथा प्रवर्द्धनका लागि चुक्लाखाङ ट्रस्टले गर्दै आएको प्रयासको प्रशंसा गरे।
---------------
हिन्दुस्थान समाचार / बिशाल
