सियोल/प्योङयाङ, १५ सेप्टेम्बर (हि.स.)। उत्तर कोरियाका राष्ट्रपति किम जोङ उनले रुससँग आफ्नो देशको सम्बन्धलाई अझ सुदृढ बनाउने प्रतिबद्धता व्यक्त गरेका छन्। सरकारी सञ्चारमाध्यमले मंगलबार दिएको जानकारीअनुसार किमले रुसी राष्ट्रपति भ्लादिमिर पुतिनलाई पठाएको सन्देशमा दुवै देशबीचको संयुक्त सहयोगलाई व्यापक रूपमा विस्तार तथा गहिरो बनाउने प्रतिबद्धता जनाएका छन्।
दक्षिण कोरियाको सरकारी समाचार संस्था योनहापका अनुसार, पुतिनले उत्तर कोरियाको स्थापना भएको ७८औँ वार्षिकोत्सवका अवसरमा गत ९ सेप्टेम्बरमा पठाएको बधाई सन्देशको जवाफमा किमले उक्त सन्देश पठाएका हुन्। किमले पुतिनको सन्देशप्रति आभार व्यक्त गर्दै रुससँगको सहयोगलाई अझ अघि बढाउने बताएका छन्।
किमले आफ्नो सन्देशमा मित्रता, असल छिमेकी सम्बन्ध, पारस्परिक सहयोग तथा दुवै देशबीचको गठबन्धनका बलियो सम्बन्धको परम्पराका आधारमा रुससँगको संयुक्त कार्यलाई व्यापक रूपमा विस्तार र गहिरो बनाउनु उत्तर कोरियाको लक्ष्य रहेको बताएका छन्।
यद्यपि, किमले आफूले प्रयोग गरेको ‘संयुक्त कार्य’ भन्नाले कुन-कुन क्षेत्रमा सहयोग गर्न खोजिएको हो भन्ने स्पष्ट पारेका छैनन्। यसमा दुवै देशबीच बढिरहेको सैन्य तथा आर्थिक सहयोग पनि समावेश हुन सक्ने अनुमान गरिएको छ।
किमले ऐतिहासिक उथल-पुथलका बावजुद दुवै देशले आफ्नो गठबन्धनको गौरवपूर्ण इतिहासको नयाँ अध्याय लेखिरहेको बताएका छन्। उनले युक्रेनविरुद्धको युद्धमा रुसप्रति उत्तर कोरियाको अटुट समर्थनको प्रतिबद्धता पनि दोहोर्याएका छन्।
उत्तर कोरिया र रुसबीचको सम्बन्ध पछिल्लो समय तीव्र रूपमा सुदृढ हुँदै गएको छ। जून २०२४ मा पुतिनको प्योङयाङ भ्रमणका क्रममा दुवै देशले व्यापक रणनीतिक साझेदारीसम्बन्धी सन्धिमा हस्ताक्षर गरेका थिए। उक्त सम्झौतामा कुनै एक देशमाथि आक्रमण भएको अवस्थामा अर्को देशले बिना ढिलाई सैन्य सहायता उपलब्ध गराउने प्रावधान रहेको छ।
रिपोर्टहरूका अनुसार, उत्तर कोरियाले युक्रेनविरुद्धको युद्धमा रुसलाई सहयोग गर्न हजारौँ सैनिकसँगै परम्परागत हतियारसमेत पठाएको छ। यसले मस्को र प्योङयाङबीच बढ्दो सैन्य साझेदारीलाई लिएर पश्चिमी देशहरूको चिन्ता अझ बढाएको छ।
हिन्दुस्थान समाचार / बिशाल
