गान्तोक, १८ सेप्टेम्बर (हि.स.)। उत्तरपूर्वी क्षेत्रका लागि ‘वन हेल्थ जुनोटिक डिजिज प्रायोरिटाइजेसन’ विषयमा चेन्नईमा आयोजित कार्यशालामा सिक्किमका चिकित्सक तथा पशु स्वास्थ्य विशेषज्ञहरूले सहभागिता जनाएका छन्। भारतीय आयुर्विज्ञान अनुसन्धान परिषद्- राष्ट्रिय महामारी विज्ञान संस्थान, चेन्नईको आयोजनामा तथा अमेरिकी रोग नियन्त्रण तथा रोकथाम केन्द्रको प्राविधिक सहयोगमा ८ देखि ११ नोभेम्बर, २०२६ सम्म कार्यशाला आयोजना गरिएको थियो।

पशुपालन एवं पशु चिकित्सा सेवा विभागले जानकारी गराए अनुसार, कार्यशालामा उत्तरपूर्वी क्षेत्रका स्वास्थ्य तथा परिवार कल्याण विभाग, पशुपालन तथा पशु चिकित्सा सेवा विभाग, वन तथा वन्यजन्तु प्रबन्धन विभागलगायत विभिन्न क्षेत्रका विज्ञ तथा अधिकारीहरूको सहभागिता रहेको थियो। सिक्किमबाट एसटीएनएम अस्पताल, पशुपालन तथा पशु चिकित्सा सेवा विभाग र सिक्किम मणिपाल आयुर्विज्ञान संस्थानका प्रतिनिधिहरू सहभागी बनेका थिए।

कार्यशालामा जनस्वास्थ्यमा पर्ने प्रभाव, सङ्क्रमणको सम्भावना, रोगको गम्भीरता तथा क्षेत्रीय सान्दर्भिकताका आधारमा जुनोटिक रोगहरूको प्राथमिकता निर्धारणबारे विस्तृत छलफल गरिएको थियो। साथै ‘वन हेल्थ’ दृष्टिकोणमार्फत प्राथमिकतामा परेका जुनोटिक रोगको तयारी, रोकथाम, निगरानी तथा समन्वयात्मक प्रतिकार्यलाई सुदृढ बनाउन प्रमाणमा आधारित बहुक्षेत्रीय कार्ययोजना विकासमा समेत जोड दिइएको थियो।

कार्यशालाबाट उत्तरपूर्वी क्षेत्रका लागि प्राथमिकतामा राख्नुपर्ने आठ प्रमुख जुनोटिक रोगको सूची तयार गरिएको छ। यी रोगको रोकथाम तथा नियन्त्रणका लागि लक्ष्य र समयसीमासहितको कार्ययोजना पनि तयार गरिएको जनाइएको छ। सम्बन्धित कार्यशालाका दस्तावेजको अन्तिम संस्करण भारतीय आयुर्विज्ञान अनुसन्धान परिषद्- राष्ट्रिय महामारी विज्ञान संस्थान र अमेरिकी रोग नियन्त्रण तथा रोकथाम केन्द्रले चाँडै सार्वजनिक गर्ने जनाइएको छ।

सिक्किमका स्वास्थ्य तथा पशु चिकित्सा क्षेत्रका विशेषज्ञहरूको सहभागिताले उदीयमान तथा पुनःउदीयमान जुनोटिक रोगविरुद्ध ‘वन हेल्थ’ अवधारणाअन्तर्गत सहकार्य र तयारीलाई सुदृढ गर्ने राज्यको निरन्तर प्रतिबद्धतालाई प्रतिबिम्बित गरेको प्रेस विज्ञप्तिमा उल्लेख छ।

हिन्दुस्थान समाचार / बिशाल