गान्तोक, १९ सेप्टेम्बर (हि.स.)। प्रधानमन्त्री नरेन्द्र मोदीको जन्मदिनको अवसरमा जारी सेवा संकल्प अभियानअन्तर्गत भाजपा सिक्किम महिला मोर्चाले आज गान्तोकको भानुग्रामस्थित एकीकृत बाल विकास सेवा केन्द्रमा ‘आँगनवाडी मिलन’ कार्यक्रम आयोजना गरेको छ।

कार्यक्रममा अनुसूचित जाति मोर्चाकी महासचिव शशी बरदेवा मुख्य अतिथिका रूपमा उपस्थित थिइन्। यसैगरी, महिला मोर्चाकी प्रदेश अध्यक्ष तथा डीपीएचकी पार्षद् सृजना छेत्री लगायत महिला मोर्चा तथा अनुसूचित जनजाति मोर्चाका पदाधिकारी, महिला तथा बाल कल्याण विभागका पर्यवेक्षक, आँगनवाडी कार्यकर्ता तथा आशा कार्यकर्ताहरूको सहभागिता रहेको थियो।

कार्यक्रमका क्रममा आँगनवाडी कार्यकर्ता, आशा कार्यकर्ता तथा महिला तथा बाल कल्याण विभागका पर्यवेक्षकहरूलाई मातृ तथा बाल कल्याणका लागि स्थानीय तहमा गरेको निःस्वार्थ सेवा तथा समर्पणको सम्मानस्वरूप अभिनन्दन गरिएको भाजपा मिडिया सेलले बताएको छ।

बालबालिकामा थप खुशी फैलाउने उद्देश्यले कार्यक्रममा सहभागी सबै बालबालिकालाई मिठाई तथा शैक्षिक सामग्री वितरण गरिएको थियो। भाजपा सिक्किम महिला मोर्चाले जारी सेवा संकल्प अभियानअन्तर्गत यस्ता सेवामुखी कार्यक्रमलाई निरन्तरता दिँदै समुदायसँगको सहभागिता अझ सुदृढ बनाउने प्रतिबद्धता दोहोर्‍याएको छ।

हिन्दुस्थान समाचार / बिशाल