गान्तोक, २६ सेप्टेम्बर (हि.स.)। खेसे साम्दोङस्थित फलैचाडॉंडा जुनियर हाईस्कूलका तीन युवा वुशु खेलाडी आगामी २६औँ जुनियर राष्ट्रिय वुशु च्याम्पियनसिप २०२६ मा सिक्किमको प्रतिनिधित्व गर्न छनोट भएका छन्। प्रतियोगिता १८ देखि २४ दिसम्बर, २०२६ सम्म ओडिशाको भुवनेश्वरमा आयोजना हुनेछ। छनोट हुने खेलाडीहरूमा शिशिर ठटाल, अर्नव नेपाल र समीर क्षेत्री रहेका छन्।

सिक्किमका प्रतिभाशाली युवा पुशु खेलाडी पहिचान गरी राष्ट्रियस्तरको प्रतियोगितामा सहभागी हुने अवसर प्रदान गर्ने उद्देश्यले सिक्किम अमेच्योर वुशु संघले २२ सेप्टेम्बरमा गान्तोकस्थित जिल्ला शिक्षा तथा प्रशिक्षण संस्थानमा छनोट परीक्षण आयोजना गरेको बताइएको छ। तीनैजना विद्यार्थीले सिक्किम सरकारको खेलकुद तथा युवा मामिला विभागकी सहायक वुशु प्रशिक्षक बिनिता राईबाट प्रशिक्षण लिँदै आएका छन्।

उनी हाल राक्दोङ तिन्तेक खण्डअन्तर्गत फलैचाडॉंडा सरकारी जुनियर हाईस्कूलमा कार्यरत छिन्। उनले विभिन्न विद्यालयका विद्यार्थीहरूलाई प्रशिक्षण तथा मार्गदर्शन दिँदै युवा खेलाडीको क्षमता विकास र प्रतिस्पर्धात्मक अनुभव बढाउन सहयोग गर्दै आएकी छन्।

तीन जना विद्यार्थी राष्ट्रिय प्रतियोगिताका लागि छनोट भएकोमा खुशी व्यक्त गर्दै प्रशिक्षक राईले उनीहरूको छनोट प्रशिक्षणप्रतिको समर्पण, अनुशासन र कडा मेहनतको परिणाम रहेको बताइन्। उनले तल्लो तहदेखि खेलकुदको विकास र प्रवर्द्धनमा निरन्तर सहयोग, प्रोत्साहन तथा प्रेरणा प्रदान गरेकोमा मुख्यमन्त्री प्रेमसिंह तामाङप्रति आभार व्यक्त गरिन्।

उनले खेलकुद तथा युवा मामिला विभागका मन्त्री राजु बस्नेतलाई पनि युवा खेलाडीलाई निरन्तर प्रोत्साहन र सहयोग प्रदान गर्नुका साथै नयाँ खेलाडीलाई आफ्नो खेलकुद सपना पूरा गर्ने अनुकूल वातावरण सिर्जना गरेकोमा धन्यवाद दिइन्। उनले छनोट शिविर तथा परीक्षण आयोजना गरेकोमा सिक्किम अमेच्योर वुशु संघको पनि प्रशंसा गरेकी छन्। उनले यस्ता पहलले युवा खेलाडीहरूलाई विभिन्न प्रतियोगितामा सहभागी हुने, प्रतिस्पर्धात्मक अनुभव हासिल गर्ने तथा उच्चस्तरमा आफ्नो क्षमता विकास गर्ने महत्वपूर्ण अवसर प्रदान गर्ने बताएकी छन्।

हिन्दुस्थान समाचार / बिशाल