काठमाडौं, २७ सेप्टेम्बर (हि.स.)। पछिल्लो तीन दिनदेखि लगातार भइरहेको वर्षाका कारण नेपालको सप्तरी जिल्लामा बाढीको अवस्था गम्भीर बनेको छ। हनुमाननगर कंकालिनी नगरपालिका र तिलाठी कोइलाडी गाउँपालिकाका विभिन्न बस्तीमा बाढीको पानी पस्दा करिब ५०० घर डुबानमा परेका छन्। बाढीबाट दुई हजारभन्दा बढी मानिस प्रभावित भएका छन्।
हनुमाननगर कंकालिनी नगरपालिकाका वार्ड नम्बर ५, ७, १२ र १३ का बस्तीमा बाढीको पानी पस्दा ४८३ घर डुबानमा परेका छन्। यस्तै, तिलाठी कोइलाडी गाउँपालिकाका वडा नम्बर ४ र ५ मा १७ घर जलमग्न भएका छन्।
हनुमाननगर कंकालिनी नगरपालिकाका प्रमुख वीरेन्द्र माझीले शुक्रबार राति सप्तकोसी नदीमा पानीको सतह बढेपछि बस्तीमा बाढीको पानी पसेको बताए। उनले बाढी प्रभावितका लागि तत्काल बिहान र बेलुका गरी दिनमा दुई पटक खानाको व्यवस्था गरिएको जानकारी दिए।
पानीको सतह केही घटेपछि प्रभावित परिवारको पहिचान गरी उनीहरूलाई थप राहत सामग्री उपलब्ध गराइने पनि माझीले बताए।
हिन्दुस्थान समाचार / बिशाल
